सञ्चारमन्त्री डा. विक्रम तिमिल्सिना कतारको दोहामा आयोजित ‘आइटियु पिपी–२६’ महासम्मेलनको उद्घाटन समारोहमा सहभागी

काठमाडौँ, कात्तिक २४ गते । सूचना तथा सञ्चारमन्त्री डा. विक्रम तिमिल्सिनाले अन्तरराष्ट्रिय दूरसञ्चार सङ्घ (आइटियू) महा-सम्मेलन २०२६ (आइटियु पिपी–२६) को उद्घाटन समारोहमा सहभागिता जनाउनुभएको छ।

नेपाली प्रतिनिधिमण्डलको नेतृत्व गर्दै कतारको दोहामा रहनुभएका सञ्चारमन्त्री डा. तिमिल्सिनाले सोमबार दोहा प्रदर्शनी तथा सम्मेलन केन्द्र (डिइसीसी) मा आयोजित उक्त भव्य सम्मेलनको उद्घाटन समारोहमा सरिक हुनुभएको हो।

सो अवसरमा उहाँले सम्मेलनमा सहभागी विभिन्न देशका प्रतिनिधिमण्डलका प्रमुखहरूको औपचारिक बैठकमा पनि भाग लिनुका साथै मित्रराष्ट्रका समकक्षीहरूसँग महत्त्वपूर्ण अन्तरक्रिया गर्नुभएको दोहास्थित नेपाली दूतावासद्वारा जारी विज्ञप्तिमा उल्लेख छ।

सम्मेलनको साइडलाइनमा सञ्चारमन्त्री डा. तिमिल्सिनासँग आइटियूको रेडियो-कम्युनिकेसन ब्युरोका निर्देशक पदका फ्रान्सेली उम्मेदवार एरिक फोर्नियरले शिष्टाचार भेटवार्ता गर्नुभएको छ। भेटका क्रममा फोर्नियरले नेपालका लागि स्पेक्ट्रम तथा भूउपग्रह कक्ष व्यवस्थापनसम्बन्धी विषयमा छलफल गर्नुका साथै आफ्नो उम्मेदवारीको योजना र दृष्टिकोणबारे मन्त्रीलाई जानकारी गराउनुभएको थियो।

त्यसैगरी, मन्त्री डा. तिमिल्सिनाले इरानका सूचना तथा सञ्चार प्रविधिमन्त्री सत्तार हाशेमी र तान्जानियाका सञ्चार तथा सूचना प्रविधिमन्त्री एन्जेलाह जस्मिन कैरुकीसँग पनि छुट्टाछुट्टै शिष्टाचार भेटवार्ता गर्नुभएको छ। उक्त भेटहरूमा दुईपक्षीय हित, आपसी चासो र प्रविधि क्षेत्रमा सहकार्यका विषयमा छलफल भएको थियो।

यसैबिच, मन्त्री डा. तिमिल्सिनाले कतार सरकारद्वारा आइटियु पीपी–२६ मा सहभागी विभिन्न देशका प्रतिनिधिमण्डलका प्रमुख तथा सदस्यहरूको सम्मानमा आयोजित विशेष रात्रिभोजमा समेत सहभागिता जनाउनुभएको छ।

अन्तरराष्ट्रिय दूरसञ्चार सङ्घको यो महा-सम्मेलन विश्वभरका दूरसञ्चार तथा सूचना प्रविधिको विश्वव्यापी नीति, नियमन र प्रविधिगत सहकार्यका विषयमा बहस तथा निर्णय गर्ने अति महत्त्वपूर्ण अन्तरराष्ट्रिय मञ्च मानिन्छ।

मन्त्री डा. तिमिल्सिनाको यस सहभागिताले अन्तरराष्ट्रिय मञ्चमा नेपालको उपस्थिति बलियो बनाउन तथा सूचना प्रविधि र दूरसञ्चारका क्षेत्रमा अन्य देशहरूसँगको सम्बन्ध थप विस्तार गर्न मद्दत पुग्ने विश्वास लिइएको छ।