लगातार चौथो जित निकाल्दै काठमान्डु गोर्खाज एनपीएलको शीर्ष स्थानमा : चितवन राइनोज १० रनले पराजित

काठमाडौँ, कात्तिक २४ गते । नेपाल प्रिमियर लिग (एनपीएल) क्रिकेटमा काठमान्डु गोर्खाजले आफ्नो उत्कृष्ट लयलाई निरन्तरता दिँदै लगातार चौथो जित दर्ता गरेको छ।

सोमबार भएको दोस्रो खेलमा काठमान्डुले चितवन राइनोजलाई १० रनले पराजित गर्दै ५ खेलमा ८ अंकका साथ अंक तालिकाको शीर्ष स्थानमा उक्लिएको छ। पहिलो खेलमा जनकपुर बोल्ट्ससँग पराजित भएयता पुनरागमन गरेको काठमान्डुले यस जितसँगै प्ले–अफमा आफ्नो स्थान लगभग सुरक्षित गरेको छ भने पराजित चितवन ५ खेलमा ५ अंकसहित चौथो स्थानमा कायम रहेको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङको निम्तो पाएको काठमान्डुले सुरुवाती ब्याटरहरूलाई सस्तोमै गुमाए पनि रशिद खानको सानदार अर्धशतकको मद्दतमा निर्धारित २० ओभरमा ८ विकेट गुमाएर १ सय ८० रनको चुनौतीपूर्ण योगफल तयार पारेको थियो।

अस्ट्रेलियन स्टार डेबिड वार्नर १ रनमै आउट भए पनि रशिदले मात्र ३० बलमा २ चौका र ४ छक्कासहित ५२ रनको उत्कृष्ट पारी खेले। यसबाहेक सहन अराचिगेले ३३, विलियम बोसिस्टोले २७ र कप्तान करण केसीले ३ छक्कासहित २० रन जोडे। चितवनका लागि रिजन ढकालले ३ तथा सिकन्दर राजा र कमलसिंह ऐरीले समान २–२ विकेट लिए।

जवाफमा १ सय ८१ रनको लक्ष्य पछ्याएको चितवनले रबि बोपाराको ५५ रनको अर्धशतकीय पारीका बाबजुद २० ओभरमा ७ विकेट गुमाएर १ सय ७० रन मात्र बनाउन सक्यो। चितवनका लागि अर्जुन साउदले २३ र कामिल मिसराले २८ रन जोड्दै राम्रो सुरुआत दिलाए पनि मध्यक्रमका ब्याटरहरूले त्यसलाई फाइदामा बदल्न सकेनन्। अन्तिम ओभरमा ५५ रन बनाएका बोपारा आउट भएपछि चितवनको जितको सम्भावना समाप्त भएको थियो।

काठमान्डुको बलिङतर्फ सहन अराचिगेले ४ ओभरमा ३७ रन खर्चेर २ विकेट लिए भने कप्तान करण केसी, जहाँन्दद खान, सन्तोष यादव र गणेश गौतमले १–१ विकेट हात पार्दै टिमको जित सुनिश्चित गरे।