एनपीएलले नेपाली क्रिकेट र पर्यटन क्षेत्रको विश्वभर प्रवर्द्धन गरिरहेको छ : मन्त्री सस्मित पोखरेल

काठमाडौँ, कात्तिक २१ गते । शिक्षा तथा खेलकुदमन्त्री सस्मित पोखरेलले नेपाल प्रिमियर लिग (एनपीएल) ले नेपाली क्रिकेटको मात्र नभई समग्र पर्यटन क्षेत्रको विश्वव्यापी प्रवर्द्धनमा अतुलनीय भूमिका निर्वाह गरिरहेको बताउनुभएको छ।

‘एक्सट्रिम इनर्जी कान्तिपुर म्याक्स स्पोर्ट समिट २०२६’ को उद्घाटन सत्रलाई सम्बोधन गर्दै मन्त्री पोखरेलले जारी एनपीएल क्रिकेट लिगले आमदर्शकको चाहना र समयको आवश्यकतालाई सफलतापूर्वक समेट्न सकेको धारणा व्यक्त गर्नुभयो। लामो समयसम्म खेलकुदलाई केवल एक सीमित प्रतिस्पर्धाको रूपमा मात्र हेर्ने गरिएको भए पनि यस्ता भव्य प्रतियोगिताहरूले देशको खेल इकोसिस्टमलाई नै बलियो बनाउँदै आएको उहाँको भनाइ थियो।

खेल क्षेत्रलाई सबल बनाउन व्यापार, लगानी र व्यावसायिक दृष्टिकोण अपरिहार्य हुने उल्लेख गर्दै मन्त्री पोखरेलले यस्ता कार्यक्रमहरूले परम्परागत धारणामा परिवर्तन ल्याउनुका साथै नयाँ–नयाँ आर्थिक तथा व्यावसायिक अवधारणाको समेत थालनी गर्ने बताए।

एनपीएल विगत तीन वर्षदेखि नेपालमा मात्र नभई अन्तर्राष्ट्रिय स्तरमै एक उत्कृष्ट उदाहरणका रूपमा स्थापित हुँदै गएको बताउँदै उहाँले विश्व क्रिकेट समुदायले समेत नेपाली क्रिकेटको चर्चा गर्नुले नेपालमा यसको असीमित सम्भावना रहेको स्पष्ट भएको उल्लेख गर्नुभयो। अब क्रिकेटको यो सफलतालाई आधार बनाएर अन्य खेलकुद विधाहरूलाई पनि उत्तिकै प्राथमिकता र सहयोग गर्नुपर्ने आवश्यकता औँल्याउनुभयो।

कार्यक्रमका क्रममा मन्त्री पोखरेलले एनपीएलमा आबद्ध भएर नेपालमा खेलिरहेका सम्पूर्ण विदेशी खेलाडीहरूलाई धन्यवाद ज्ञापन गर्नुभयो। विदेशी खेलाडीहरूको उपस्थिति र सहभागिताले अन्तर्राष्ट्रिय क्षेत्रमा नेपालको पर्यटन प्रवर्द्धन गर्न र देशको सकारात्मक छवि निर्माण गर्न ठूलो सहयोग पुगेको उहाँको तर्क थियो। सम्पूर्ण नेपाली नागरिक र नेपाल सरकारको तर्फबाट उहाँले विदेशी खेलाडी तथा आयोजकहरूलाई आभार व्यक्त गर्नुभयो।

यो खेलकुद शिखर सम्मेलनले खेल क्षेत्रमा नीतिगत सुधार, लगानी विस्तार र व्यावसायिकरणका निम्ति नयाँ मार्गचित्र तयार गर्ने अपेक्षा गरिएको छ।