प्रा. डा. गोविन्द केसी र सरकारबीच छबुँदे सहमति : २५औँ सत्याग्रह अन्त्य

काठमाडौं, कात्तिक २१ गते । चिकित्सा शिक्षा र स्वास्थ्य क्षेत्रको सुधारको माग राख्दै आमरण अनशनमा रहनुभएका प्रा. डा. गोविन्द केसी र सरकारबीच शनिबार महत्वपूर्ण छ-बुँदे सहमति भएको छ।

सरकारतर्फबाट शिक्षा तथा खेलकुदमन्त्री सस्मित पोखरेल र डा. केसीबीच भएको यस सहमतिपछि उहाँले आफ्नो २५औँ सत्याग्रह औपचारिक रूपमा अन्त्य गर्नुभएको छ। प्रधानमन्त्री तथा मन्त्रिपरिषद्का कार्यालयका स्वास्थ्य सल्लाहकार प्रा. डा. जगदीश अग्रवाल, प्रतिनिधिसभा सदस्य पुकार बम र नेपाल चिकित्सक संघका अध्यक्ष डा. बद्री रिजाल लगायतको उपस्थितिमा यो सहमतिपत्रमा हस्ताक्षर भएको हो।

सहमति अनुसार शहिद दशरथ चन्द स्वास्थ्य विज्ञान विश्वविद्यालयमा एमबीबीएस लगायतका शैक्षिक कार्यक्रम सञ्चालन गर्न अनुमति दिई विद्यार्थी सिट संख्या निर्धारण गरिनेछ भने नेपाली सेना स्वास्थ्य विज्ञान प्रतिष्ठानमा सिट थपसम्बन्धी निर्णयको छानबिन गर्न प्रा. डा. रमेशप्रसाद आचार्यको संयोजकत्वमा पाँच सदस्यीय समिति गठन गरिनेछ।

यसका साथै, शहिद दशरथ चन्द स्वास्थ्य विज्ञान विश्वविद्यालय ऐन, २०८२ मा पदाधिकारीको योग्यता र नियुक्तिसम्बन्धी व्यवस्था संशोधनका लागि दुई हप्ताभित्र मन्त्रिपरिषदबाट अध्यादेश जारी गर्ने प्रक्रिया अघि बढाउने र विगतमा भएका सहमतिहरूलाई समेत अक्षरशः कार्यान्वयन गर्ने सहमतिमा उल्लेख छ।

सरकारले डडेलधुरा, इलाम, उदयपुर र बर्दिबासमा सरकारी मेडिकल कलेज तथा स्वास्थ्य विज्ञान प्रतिष्ठान स्थापना र सञ्चालनका लागि पूर्वाधार विकास तथा बजेट विनियोजन प्रक्रियालाई तीव्रता दिने प्रतिबद्धता जनाएको छ। भएका सहमतिको प्रभावकारी कार्यान्वयन तथा अनुगमनका लागि दुवै पक्षका प्रतिनिधिहरू सम्मिलित एक संयुक्त कार्यदलसमेत गठन गरिएको छ, जसले महिनामा कम्तीमा एकपटक बैठक बसी अनुगमन गर्नेछ।

डा. केसीको यो सत्याग्रह र सरकारसँगको सहमतिले लामो समयदेखि अल्झिएका चिकित्सा शिक्षा सुधारका मुद्दाहरूलाई निष्कर्षमा पुर्‍याउनुका साथै स्वास्थ्य क्षेत्रको नीतिगत र संरचनागत सुधारमा नयाँ मार्गप्रशस्त गर्ने अपेक्षा गरिएको छ।