नागरिकलाई केन्द्रमा राखेर परिणाममुखी सेवा प्रवाह गर्न मन्त्री डा. तिमिल्सिनाको निर्देशन

काठमाडौँ, कात्तिक २० गते । सूचना तथा सञ्चारमन्त्री डा. विक्रम तिमिल्सिनाले नागरिकलाई केन्द्रबिन्दुमा राखेर सेवा प्रवाहलाई थप प्रभावकारी र नतिजामूलक बनाउन मन्त्रालय तथा मातहतका निकायका प्रमुखहरूलाई कडा निर्देशन दिनुभएको छ।

सूचना तथा सञ्चार मन्त्रालयमा आयोजित चालु आर्थिक वर्ष २०८३-८४ को प्रथम त्रैमासिक समीक्षा तथा मन्त्रालयस्तरीय विकास समस्या समाधान समिति (एमडेक) को बैठकलाई सम्बोधन गर्दै उहाँले केवल कार्यालयका नियमित गतिविधि सञ्चालन गर्नुमात्र उपलब्धि नभई त्यसले नागरिकको जीवनमा पार्ने प्रभाव नै कार्यसम्पादनको मुख्य आधार हुनुपर्नेमा जोड दिनुभयो।

कार्यसम्पादनका क्रममा देखिने समस्याहरूको समाधानका लागि तीन महिनासम्मको समीक्षा अवधि कुरेर बस्न नहुने स्पष्ट पार्दै मन्त्री तिमिल्सिनाले समस्या देखिनासाथ तत्काल सम्बन्धित महाशाखा वा मन्त्रीसमक्ष जानकारी गराएर समाधानका उपायसहित उपस्थित हुन आग्रह गर्नुभयो। सरकारले निर्धारण गरेको लक्ष्य हासिल गर्न सबै तहमा जवाफदेहिताको संयन्त्र बलियो बनाउनुपर्ने उहाँको भनाइ थियो। बजेट खर्च गर्नुमात्र ठूलो कुरा नभई विनियोजित रकमको सही सदुपयोग र खरिद प्रक्रियालाई पारदर्शी तथा समयसापेक्ष बनाउनुपर्नेमा उहाँले जोड दिनुभयो।

बैठकमा सञ्चार सचिव राजेन्द्रकुमार पौडेलले मन्त्रालयका नीतिगत र बजेटगत क्रियाकलापहरूलाई तीव्रताका साथ अघि बढाइएको जानकारी दिनुभयो। पहिलो त्रैमासिकको समग्र प्रगति सन्तोषजनक रहेको र आगामी दिनमा सेवा प्रवाहलाई थप छिटोछरितो, गुनासोरहित तथा प्रविधिमैत्री बनाइने प्रतिबद्धता उहाँले व्यक्त गर्नुभयो।

संस्थागत गोपनीयता र पेसागत इमानदारी कायम राख्न निर्देशन दिँदै मन्त्री तिमिल्सिनाले संस्थाको हितविपरीत हुने गतिविधिहरूलाई सरकारले गम्भीर रूपमा लिने चेतावनीसमेत दिनुभएको छ। यस समीक्षा बैठकले मन्त्रालय अन्तर्गतका निकायहरूमा देखिएका प्रशासनिक अड्चनहरू फुकाउन र कार्यशैलीमा सुधार ल्याउन महत्त्वपूर्ण दिशा निर्देश गरेको अपेक्षा गरिएको छ।