नेपालको विशिष्ट राष्ट्रिय पहिचान र समकालीन उपलब्धिलाई विश्वमाझ स्थापित गर्न सरकार प्रतिबद्ध : परराष्ट्रमन्त्री खनाल

काठमाडौँ, कात्तिक १९ गते । परराष्ट्रमन्त्री शिशिर खनालले नेपालको विशिष्ट राष्ट्रिय पहिचान, सांस्कृतिक विविधता, प्राकृतिक सम्पदा र समकालीन उपलब्धिलाई विश्वमाझ थप सुदृढ रूपमा स्थापित गर्न सरकार कटिबद्ध रहेकोबारे प्रस्ट पार्नुभएको छ।

परराष्ट्र मामिला अध्ययन प्रतिष्ठान (आइएफए) द्वारा आयोजित ‘ब्रान्ड नेपालः नेसनल एसेट, ग्लोबल न्यारेटिभ्स र स्ट्राटेजिक अपरच्युनिटिज’ विषयक परियोजना प्रतिवेदन सार्वजनिक तथा नीतिगत संवाद कार्यक्रमलाई सम्बोधन गर्दै उहाँले नेपालको अन्तर्राष्ट्रिय छवि देशको विकास आकाङ्क्षा र परराष्ट्र नीतिको महत्वपूर्ण रणनीतिक सम्पत्ति भएको व्याख्या गर्नुभयो। राष्ट्रको प्रतिष्ठाले कूटनीतिक सम्बन्ध, लगानी र विश्वजगत्मा देशको स्थान निर्धारण गर्ने उहाँको भनाइ थियो।

नेपालको विश्वव्यापी पहिचान हिमाल र लुम्बिनीमा मात्र सीमित नरही काठमाडौँको हस्तकला, हिमाली बुनाइ, थारू कला, मैथिली तथा भोजपुरी साहित्य र किरात परम्परासमेत सामूहिक पहिचानका आधार रहेको मन्त्री खनालले औँल्याउनुभयो। नेपाली समुदायको उद्यमशीलता र युवा नवप्रवर्तकहरूको योगदानले यसलाई अझ समृद्ध बनाएको छ।

ब्रान्ड नेपालको प्रवर्धनका लागि राष्ट्रिय सम्पदाको मूल्य अभिवृद्धि गर्ने, सार्वजनिक कूटनीतिमार्फत प्रभावकारी राष्ट्रिय पहिचान निर्माण गर्ने र यसलाई उदीयमान रणनीतिक अवसरसँग जोड्ने गरी तीनवटा मुख्य प्राथमिकतामा सरकारले काम गरिरहेको उहाँले जानकारी दिनुभयो।

परम्परागत ज्ञान, कृषि अभ्यास र मौलिक उत्पादनहरूको अन्तर्राष्ट्रिय प्रतिस्पर्धात्मक क्षमता बढाउन बौद्धिक सम्पत्ति संरक्षण, भौगोलिक सङ्केत (जिआई) र गुणस्तर मापदण्ड आवश्यक रहेको मन्त्री खनालले उल्लेख गर्नुभयो। यसका साथै, सन् २०२५ मा आयोजना भएको र सन् २०२७ मा पुनः आयोजना हुने तयारीमा रहेको ‘सगरमाथा संवाद’ जस्ता मञ्चहरूले जलवायु परिवर्तनजस्ता विश्वव्यापी मुद्दामा नेपालको रचनात्मक भूमिका स्थापित गर्न ठुलो सहयोग पुर्‍याएको उहाँले बताए।

जलविद्युत्, उच्च मूल्यको पर्यटन, डिजिटल सेवा, नवप्रवर्तन र सिर्जनशील उद्योगलाई नेपालका उदीयमान रणनीतिक अवसरका रूपमा लिँदै मन्त्री खनालले परराष्ट्र मन्त्रालय र विदेशस्थित नियोगहरूले यी सम्भावनालाई वैदेशिक लगानी र प्रविधिसँग जोड्न सक्रिय रूपमा काम गरिरहेको स्पष्ट पार्नुभयो।