सरकारद्वारा नेपाल बीमा प्राधिकरणको अध्यक्षमा राजन विक्रम थापा नियुक्त : अर्थमन्त्री वाग्लेद्वारा गराए शपथ

काठमाडौँ, कात्तिक १७ गते । सरकारले नेपाल बीमा प्राधिकरणको अध्यक्ष पदमा राजन विक्रम थापालाई नियुक्त गरेको छ।

अर्थ मन्त्रालयद्वारा गठन गरिएको छनोट समितिको सिफारिसका आधारमा मंगलबार बसेको मन्त्रिपरिषद् बैठकले थापालाई सो महत्त्वपूर्ण जिम्मेवारीमा नियुक्त गर्ने निर्णय गरेको हो। बीमा क्षेत्रको नियमन, नियमपालना र समग्र बजारको सुदृढीकरणका लागि प्राधिकरणको नेतृत्व चयनलाई चासोका साथ हेरिएको थियो।

नवनियुक्त अध्यक्ष थापाले बुधबार अर्थ मन्त्रालयमा आयोजित एक विशेष कार्यक्रमका बीच पद तथा गोपनीयताको शपथ लिनुभएको छ। अर्थमन्त्री डा. स्वर्णिम वाग्लेले उहाँलाई पद तथा गोपनीयताको शपथ गराउनुभएको हो। शपथग्रहण पश्चात् अर्थमन्त्री वाग्लेले नवनियुक्त अध्यक्ष थापालाई विशेष निर्देशन दिँदै बीमा क्षेत्रको दायरा र विश्वसनीयता वृद्धि गर्न निडर तथा निर्धक्क भएर आक्रामक रूपमा काम गर्न निर्देशन दिनुभएको छ।

विगत लामो समयदेखि आर्थिक तथा वित्तीय क्षेत्रमा अनुभव सँगाल्नुभएका थापासामू बीमा बजारमा देखिएका विसङ्गतिहरूको अन्त्य गर्ने, नीतिगत सुधार ल्याउने र बीमितहरूको हित संरक्षण गर्ने ठूला चुनौती र अवसरहरू रहेका छन्। मुलुकको अर्थतन्त्रलाई गतिशीलता प्रदान गर्न बीमा क्षेत्रको भूमिका महत्त्वपूर्ण मानिने भएकाले नयाँ नेतृत्वबाट प्रभावकारी कार्यसम्पादनको अपेक्षा गरिएको छ।

सरकारको यो निर्णयसँगै बीमा प्राधिकरणले पूर्ण नेतृत्व पाएको छ भने बजारका सरोकारवालाहरूले पनि नयाँ नेतृत्वसँगै बीमा क्षेत्रमा सुधार आउने विश्वास व्यक्त गरेका छन्।