सामान्य अंकले बढे सेयर बजार: नेप्से परिसूचक २६६५ अंकमा, कारोबार रकममा उच्च वृद्धि

काठमाडौँ, कात्तिक १८ गते । अघिल्लो दिन ६.६२ अंकले बढेको सेयर बजारमा बुधबार सामान्य सुस्तता देखिए पनि नेप्से परिसूचक २६६५ अंकमा कायम हुन सफल भएको छ।

आज दिनभरको कारोबारमा बजार जम्मा १.४० अंकले बढेको छ। यद्यपि, बजारमा सूचक कम बढे पनि कारोबार रकममा भने उल्लेख्य वृद्धि देखिएको छ। अघिल्लो दिन ५ अर्ब ६५ करोड रुपैयाँको सेयर कारोबार भएकोमा आज बढेर ७ अर्ब ४३ करोड रुपैयाँ पुगेको छ। आज कुल २६९ भन्दा बढी कम्पनीको कारोबार हुँदा ९८ वटा कम्पनीको मूल्य बढेको छ भने १७१ वटाको घटेको छ र ९ वटा कम्पनीको मूल्य स्थिर रहेको छ।

आज अन्य समूह सबैभन्दा धेरै ६.१८ प्रतिशतले बढेको छ। यो समूहमा रहेका दुई ठूला पुनर्बीमा कम्पनी— नेपाल पुनर्बीमा र हिमालयन रिइन्स्योरेन्सको मूल्यमा आएको उच्च वृद्धिका कारण समग्र समूह नै उकालो लागेको हो। सरकारको स्वामित्व रहेको नेपाल पुनर्बीमा कम्पनीले हकप्रद सेयर जारी गर्ने मन्त्रिपरिषद्को निर्णयपछि यसको सेयरमूल्य सर्वाधिक १५ प्रतिशतले बढेको छ। त्यस्तै, अर्को हिमालयन रिइन्स्योरेन्सको मूल्य पनि ११.४८ प्रतिशतले बढेको छ।

अन्य समूहका साथै व्यापार समूह १.११ प्रतिशत र जीवन बीमा समूह ०.१० प्रतिशतले बढेका छन् भने बाँकी बैंकिङ, विकास बैंक, फाइनान्स, होटल तथा पर्यटन, जलविद्युत्, लगानी, उत्पादन, माइक्रोफाइनान्स र निर्जीवन बीमा समूहहरू राताम्मे हुँदै घटेका छन्। पुनर्बीमा कम्पनीहरूसँगै श्वेतगंगा हाइड्रोको ८.६५ प्रतिशत, घोराही सिमेन्टको ५ प्रतिशत र नेपाल रिपब्लिक मिडियाको ४.९७ प्रतिशतले मूल्य बढेको छ। यता शिखर पावर र सीवाईसी लघुवित्तका लगानीकर्ताहरूले भने सर्वाधिक गुमाएका छन्।

आजको कारोबारमा श्वेतगंगा हाइड्रोपावर, घोराही सिमेन्ट, हिमालयन रिइन्स्योरेन्स, एनआईसी एसिया बैंक, शिवम् सिमेन्ट र ग्लोबल आईएमई बैंक सर्वाधिक कारोबार हुने कम्पनीहरूको अग्रपंक्तिमा रहेका छन्।

शीर्ष बढ्ने कम्पनीहरू (Top Gainers)

शीर्ष घट्ने कम्पनीहरू (Top Losers)