समाजलाई अति दलीयकरणबाट मुक्त गर्नुपर्छ : रास्वपा सचेतक प्रकाशचन्द्र परियार

काठमाडौँ, कात्तिक १७ गते । राष्ट्रिय स्वतन्त्र पार्टी (रास्वपा) का संसदीय दलका सचेतक प्रकाशचन्द्र परियारले समाजलाई अति दलीयकरणबाट मुक्त गर्नुपर्नेमा जोड दिनुभएको छ।

सुनसरीमा आयोजित ‘तरहरा जेसीस सप्ताह‘ को उद्घाटन गर्दै उहाँले मुलुकका सबै क्षेत्रमा राजनीतिकरण र दलीयकरणको अत्यधिक प्रभाव पर्दा अपेक्षित रूपमा सामाजिक विकास हुन नसकेको बताउनुभयो। अहिलेको समाज विस्तारै अति दलीयकरणतर्फ धकेलिँदै गएकाले यसबाट देशलाई बचाउन आवश्यक भइसकेको उहाँको भनाइ छ।

सचेतक परियारले समाजका पछौटेपनविरुद्ध लाग्ने अगुवा सङ्घसंस्था तथा युवाहरूले आफूलाई दलीय छायाबाट टाढा राख्न सके मात्र समाजको गतिशीलता थप बढ्ने स्पष्ट पार्नुभयो। मुलुकको बृहत्तर हित र विकासका लागि यो अति आवश्यक भइसकेको उल्लेख गर्दै उहाँले युवा वर्गलाई आफ्ना योग्यता, क्षमता, उद्यमशीलता र सिर्जनशीलताको अभियानमा सक्रिय हुन आह्वान गर्नुभयो। जेसीज जस्ता सामाजिक संस्थाहरूले नेपालको सामाजिक जागरण र युवा परिचालनको क्षेत्रमा पुर्‍याएको योगदानको उहाँले उच्च प्रशंसासमेत गर्नुभयो।

कार्यक्रममा तरहरा जेसीजका पूर्वअध्यक्षहरू, विभिन्न सङ्घसंस्थाका प्रतिनिधिहरू तथा स्थानीय समाजसेवीहरूले जेसीजको भूमिका र सामाजिक अभियानबारे आ-आफ्नो धारणा राखेका थिए। सोही अवसरमा सचेतक परियारले कार्यक्रममा आयोजित विभिन्न प्रतियोगितामा विजयी भएका प्रतियोगीहरू सुरज तामाङ र प्रतिमा चौधरीलाई पुरस्कार वितरण गर्नुभएको थियो।

युवाहरूको नेतृत्व विकास र उद्यमशीलतालाई प्रोत्साहन गर्ने उद्देश्यले आयोजित यस किसिमका कार्यक्रमले स्थानीय स्तरमा सकारात्मक ऊर्जा थप्ने विश्वास लिइएको छ। दलीय राजनीतिबाट माथि उठेर सामाजिक सेवामा समर्पित हुन युवाहरूलाई प्रेरित गर्ने यस प्रकारका अभियानहरूले समाज सुधारमा महत्त्वपूर्ण भूमिका खेल्नेछन्।