प्रधानमन्त्री वालेन्द्र शाहको आसन्न भारत भ्रमणको तयारी तिब्र : मङ्सिरको दोस्रो साता सम्भावित मिति तय

काठमाडौँ, कात्तिक १८ गते । प्रधानमन्त्री वालेन्द्र शाहको आगामी मङ्सिर महिनामा हुने भारत भ्रमणको तयारी नेपाल र भारत दुवै देशमा तिब्र पारिएको छ।

नेपालका लागि नवनियुक्त भारतीय राजदूत कार्यभार सम्हाल्न नेपाल आइसकेका छन् भने भ्रमणको तयारीबारे छलफल गर्न भारतका विदेश सचिव बुधबार नेपाल आउँदै हुनुहुन्छ। भारत सरकारले मङ्सिर ७, ८ र ९ गतेलाई सम्भावित भ्रमणको मिति मानेर तयारी गरिरहेको छ। परराष्ट्र मन्त्रालयका प्रवक्ता लोकबहादुर क्षेत्रीका अनुसार प्रधानमन्त्रीको औपचारिक मिति दुवै देशको अनुकूलतामा छिट्टै सार्वजनिक गरिनेछ।

यस पटकको भ्रमणलाई केवल औपचारिकतामा सीमित नराखी दुई देशबीचको दीर्घकालीन र विकास साझेदारीमा केन्द्रित बनाउने योजना दुवै सरकारको रहेको छ। परराष्ट्रमन्त्री शिशिर खनालका अनुसार आफ्नो भारत भ्रमणका क्रममा भारतीय विदेशमन्त्री सुब्रमन्यम जयशङ्करसँग भएको भेटवार्तामै प्रधानमन्त्री शाहको भ्रमण परिणाममुखी र प्रस्ट देखिएको हुनुपर्ने विषयमा जोड दिइएको थियो। पारम्परिक व्यापार, पारवहन र सीमा व्यवस्थापनका मुद्दाभन्दा अगाडि बढेर सम्बन्धलाई थप सुदृढ बनाउने नेपाल सरकारको रणनीति छ।

विशेष गरी सन् २००९ को व्यापार सम्झौताका केही बुँदाहरूमा परिमार्जन गर्न नेपालले अहिलेदेखि नै चासो देखाएको छ। यसबाहेक सम्पर्क सञ्जाल विस्तार, ऊर्जा, विद्युत् व्यापार, विपत्पछिको पुनर्निर्माण र १ बिलियन डलर बराबरको आर्थिक सहयोगका विषयहरू नेपालको प्राथमिकतामा रहेका छन्। भ्रमणका क्रममा काभ्रेको पनौतीमा निर्माण भएको प्रहरी एकेडेमी लगायतका साझेदारीयुक्त परियोजनाहरूको दुवै देशका प्रधानमन्त्रीबाट उद्घाटन गर्ने सम्भावनासमेत रहेको मन्त्रालयले जनाएको छ।

उच्चस्तरीय यस भ्रमणले नेपाल र भारतबीचको आर्थिक कूटनीति तथा द्विपक्षीय सम्बन्धमा नयाँ आयाम थप्ने अपेक्षा गरिएको छ। दुवै देशका अधिकारीहरूबीच लगातार भइरहेका छलफल र गृहकार्यले भ्रमणलाई ऐतिहासिक र उपलब्धीमूलक बनाउने विश्वास लिइएको छ।