मन्त्री सीता बादी आज रुकुमपश्चिम आउँदै : विपद् प्रभावित र दलित समुदायसँग अन्तरक्रिया गर्ने कार्यक्रम

रुकुमपश्चिम, कात्तिक १८ गते । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सीता बादी आज रुकुमपश्चिम आउने हुनुभएको छ।

सामाजिक सुरक्षा तथा बाल संरक्षण कार्यक्रमको प्रभावकारिता अनुगमन गर्ने तथा स्थानीय आमा समूह, विपद् प्रभावित महिला, बालबालिका एवं दलित समुदायसँग अन्तरक्रिया गर्ने मुख्य उद्देश्यसहित उहाँ रुकुम भ्रमणमा आउन लाग्नुभएको हो। राष्ट्रिय स्वतन्त्र पार्टीका युवा नेता पुस्तक चन्दका अनुसार मन्त्री बादीसहितको सचिवालय टोली आज बेलुका रुकुमपश्चिम आइपुग्ने कार्यक्रम तय भएको छ।

भ्रमण तालिका अनुसार सल्यान हुँदै रुकुम प्रवेश गर्नुहुने मन्त्री बादीले आजै बेलुका त्रिवेणी गाउँपालिकाको सिम्रुतुमा विपद् प्रभावित महिला, बालबालिका र दलित समुदायसँग भेटघाट गर्नुहुनेछ। त्यसैगरी, भोलि बिहीबार बिहान सानीभेरी गाउँपालिकामा सञ्चालित सामाजिक सुरक्षा तथा बाल संरक्षण कार्यक्रमको अनुगमन तथा निरीक्षण कार्यक्रममा उहाँ सरिक हुनेछिन्।

बिहीबार नै चौरजहारी नगरपालिकामा पुगी मन्त्री बादीले आमा समूह, विपद् प्रभावित परिवार, दलित समुदाय तथा स्थानीय बौद्धिक व्यक्तित्वहरूसँग विस्तृत अन्तरक्रिया गर्ने कार्यक्रम निर्धारण गरिएको छ। यस महत्वपूर्ण भ्रमणका क्रममा जिल्लाका समग्र समस्या, नागरिकका गुनासा तथा रचनात्मक सुझावहरू मन्त्रीसमक्ष राख्न रास्वपा रुकुमपश्चिमले स्थानीय तह र सम्बन्धित पक्षलाई आग्रह गरेको छ।

सरकारका मन्त्री स्तरबाट हुने यस प्रकारका स्थलगत अनुगमन तथा अन्तर्क्रियाले स्थानीय स्तरका समस्या बुझ्न र नीतिगत सुधार गर्न ठुलो टेवा पुग्ने विश्वास गरिएको छ। विपद् प्रभावित क्षेत्रका नागरिकहरूको अवस्था बुझ्दै उनीहरूलाई राहत र सहजीकरणको अनुभूति गराउन यो भ्रमण उपलब्धिमूलक हुने अपेक्षा छ।