चाडपर्व लक्षित सवारी चेकिङ कडा: मापसे गर्नेसहित ११ जना चालक कारबाहीमा

सल्यान, असोज २१ गते । सल्यानमा चाडपर्वलाई लक्षित गरी सञ्चालन गरिएको ‘सुरक्षित यात्रा अभियान‘ अन्तर्गत गरिएको सवारी साधन जाँचका क्रममा ११ जना चालक कारबाहीमा परेका छन्। बागचौर नगरपालिका–२ थारमारेस्थित राप्ती राजमार्गमा मङ्गलबार गरिएको संयुक्त चेकिङका क्रममा उनीहरूलाई कारबाही गरिएको हो।

इलाका प्रहरी कार्यालय थारमारे, जिल्ला ट्राफिक प्रहरी कार्यालय सल्यान र प्राथमिक स्वास्थ्य केन्द्र थारमारेका स्वास्थ्यकर्मीको संयुक्त टोलीले कुल १२९ वटा सवारी साधन तथा चालकहरूको परीक्षण गरेको थियो। सो क्रममा ८४ जना चालकको मापसे (मादक पदार्थ सेवन) परीक्षण गर्दा ३ जना मोटरसाइकल चालकले मापसे गरेको पाइएको थियो।

त्यस्तै, लागूपदार्थ सेवन (लापसे) तर्फ ३ जना चालकको परीक्षण गरिएकोमा कसैमा पनि लापसे नभेटिएको प्रहरीले जनाएको छ। अन्य ट्राफिक नियम उल्लङ्घन गर्ने ८ जना सवारी चालकहरूलाई पनि कारबाही गरिएको छ, जसमा ४ वटा मोटरसाइकल, १ ट्याक्टर, २ ट्रक र १ अटो चालक रहेका छन्।

चाडपर्वका बेला सवारी साधन तथा यात्रुको चाप बढ्ने भएकाले सम्भावित दुर्घटना न्यूनीकरण र सुरक्षित यातायात व्यवस्थापनका लागि जिल्लाभर अभियानलाई तीव्रता दिइएको छ। असोज १७ गतेदेखि सुरु भएको यस अभियानमार्फत प्रहरीले चालक, यात्रु र पैदलयात्रीहरूलाई सडक सुरक्षा नियम पालना गर्न सचेत गराउँदै आएको छ।

चेकिङ तथा कारबाहीको विवरण