प्रहरी देख्दा नागरिकले डर होइन, भरोसा महसुस गर्नुपर्छ : नवनियुक्त आइजीपी मनोज केसी

काठमाडौँ, कात्तिक १८ गते । नवनियुक्त प्रहरी महानिरीक्षक (आइजीपी) डा. मनोज केसीले नागरिकको सुरक्षा र सम्मानलाई आफूले सदैव सर्वोपरि राख्ने दृढ प्रतिबद्धता व्यक्त गर्नुभएको छ।

गृह मन्त्रालयमा प्रहरी महानिरीक्षकको दर्ज्यानी चिह्नबाट सुशोभित भएपछि संक्षिप्त सम्बोधन गर्दै उहाँले संविधान र कानुनप्रति सधैँ अविचलित रहिरहने प्रण गर्नुभएको हो। प्रहरी संगठनको मर्यादा, व्यावसायिकता र निष्पक्षतासँग आफूले कुनै पनि हालतमा सम्झौता नगर्ने उद्घोष गर्दै उहाँले जनतासँगको आत्मीय सम्बन्ध नै प्रहरीको सबैभन्दा ठुलो पुँजी भएको औँल्याउनुभयो।

सम्बोधनका क्रममा आइजीपी डा. केसीले भन्नुभयो, ‘आजैदेखि हामी सबै मिलेर कर्तव्यबाट सेवा प्रवाहसम्मको यात्रा सुरु गरौँ, जहाँ नागरिकले प्रहरी देख्दा डर होइन, भरोसा महसुस गरुन् र प्रत्येक प्रहरीले आफ्नो बर्दीमा गर्व गर्न सकोस्।‘

मातहतका कर्मचारी तथा आधारभूत तहका प्रहरीहरूको गुनासो सुन्न आफ्नै सचिवालयमा तत्काल उच्चस्तरीय संयन्त्र सञ्चालनमा ल्याउने घोषणा पनि उहाँले गर्नुभएको छ। सीमित स्रोतसाधन, भवनको अभाव, लामो कार्यघण्टा, सरुवा–बढुवामा निष्पक्षता र मानसिक स्वास्थ्यजस्ता विषयमा आफू गम्भीर भएर लागिपर्ने उहाँको भनाइ थियो।

प्रहरी संगठनलाई थप प्रभावकारी बनाउन आवश्यक स्रोतसाधन, कानुनी स्पष्टता र कार्यगत स्वायत्तताका लागि सरकारसँग विशेष आग्रह गर्दै महानिरीक्षक डा. केसीले प्रहरीलाई दलीय राजनीतिक प्रभावबाट पूर्ण रूपमा मुक्त राख्न सबै राजनीतिक दलहरूबाट सकारात्मक सहयोगको अपेक्षा गर्नुभएको छ।

नयाँ नेतृत्वको यो स्पष्ट दृष्टिकोणले प्रहरी संगठनभित्र सुशासन कायम गर्न, चेन अफ कमाण्ड मजबुत बनाउन र नागरिकमैत्री सेवा प्रवाहको संस्कृति विकास गर्न महत्त्वपूर्ण योगदान पुर्‍याउने विश्वास लिइएको छ।