गृहमन्त्री सुधन गुरुङद्वारा नवनियुक्त प्रहरी महानिरीक्षक डा. मनोजकुमार केसीलाई दर्ज्यानी चिह्न प्रदान

काठमाडौँ, कात्तिक १८ गते । गृहमन्त्री सुधन गुरुङले नवनियुक्त प्रहरी महानिरीक्षक (आइजीपी) डा. मनोजकुमार केसीलाई दर्ज्यानी चिह्न प्रदान गर्नुभएको छ।

गृह मन्त्रालयमा बुधबार आयोजित एक विशेष समारोहका बीच मन्त्री गुरुङले प्रहरी महानिरीक्षक केसीलाई नियुक्तिपत्र हस्तान्तरण गर्दै दर्ज्यानी चिह्न सुशोभन गर्नुभएको हो। यसअघि गृहसचिवले प्रहरी महानिरीक्षकलाई दर्ज्यानी चिह्न प्रदान गर्दै आएको परम्परा रहेकोमा यसपटक गृह मन्त्रालयमा आयोजित कार्यक्रममा गृहमन्त्री स्वयम्ले यो जिम्मेवारी पूरा गर्नुभएको छ।

हालै बसेको मन्त्रिपरिषद् बैठकले प्रहरी अतिरिक्त महानिरीक्षक (एआइजी) का रूपमा कार्यरत रहनुभएका डा. केसीलाई नेपाल प्रहरीको सर्वोच्च पद महानिरीक्षकमा पदोन्नति गर्ने निर्णय गरेको थियो। नवनियुक्त आइजीपी डा. केसीले कम्बोडियाबाट द्वन्द्व रूपान्तरण विषयमा विद्यावारिधि (पिएचडी) हासिल गर्नुभएको छ। विसं २०३२ साउन २८ गते नुवाकोटमा जन्मनुभएका उहाँ विसं २०५४ चैत २८ गते प्रहरी निरीक्षक (इन्स्पेक्टर) का रूपमा प्रहरी सेवामा प्रवेश गर्नुभएको थियो।

शैक्षिक रूपमा उच्च प्राज्ञिक योग्यता र लामो समयको व्यावसायिक सुरक्षा अनुभव सङ्गाल्नुभएका डा. केसीको नेतृत्वमा नेपाल प्रहरीले मुलुकमा शान्ति सुरक्षा, अपराध नियन्त्रण र सङ्गठनभित्र सुशासन कायम गर्न थप सफलता प्राप्त गर्ने विश्वास लिइएको छ।

देशको आन्तरिक सुरक्षालाई अझ बढी प्रभावकारी, व्यावसायिक र जन-उत्तरदायी बनाउन नयाँ नेतृत्वसमक्ष अनेकन अवसर र चुनौतीहरू रहेका छन्। सरकारले सुम्पेको यो जिम्मेवारीसँगै प्रहरी संगठनमा प्रविधिमैत्री कार्यशैली र उच्च मनोबलका साथ काम गर्ने अपेक्षा गरिएको छ।