निर्वाचनबाट प्राप्त शक्तिलाई प्रतिशोधको माध्यम बनाउने छुट कसैलाई छैन : रास्वपा सभापति रवि लामिछाने

चितवन, कात्तिक २० गते । राष्ट्रिय स्वतन्त्र पार्टी (रास्वपा) का सभापति रवि लामिछानेले निर्वाचनमार्फत प्राप्त शक्तिलाई दम्भ र प्रतिशोधको साधन बनाउने छुट कसैलाई पनि नभएको बताउनुभएको छ।

शुक्रबार चितवनमा आयोजित पार्टीको विशेष कार्यक्रमलाई सम्बोधन गर्दै सभापति लामिछानेले सरकारको नेतृत्व गरिरहेको दलका नेता तथा कार्यकर्ताहरू सत्ता र शक्तिको उन्मादमा नभई उच्च जिम्मेवारीबोधका साथ जनताको पक्षमा उभिनुपर्नेमा जोड दिनुभयो। समाजले नेता तथा कार्यकर्ताहरूको हरेक गतिविधि र कार्यशैलीलाई नजिकबाट नियालिरहेकाले आलोचना हुने कुनै पनि कार्य गर्न नहुने उहाँको भनाइ थियो।

विगतमा आफ्ना दलका नेता तथा कार्यकर्ताहरूले अन्य सरकारबाट विभिन्न राजनीतिक प्रताडना र अपमान सहनुपरेको स्मरण गराउँदै लामिछानेले त्यसैको बदला लिने शैलीमा प्रशासन र प्रहरीमाथि राजनीतिक दबाब दिने कार्य आफ्नो पार्टीबाट कहिल्यै नहुने स्पष्ट पार्नुभयो।

“हिजोका सरकारबाट हामीमाथि अपमान भयो, प्रतिशोध साँधियो भन्दैमा आज प्रशासन र प्रहरीलाई राजनीतिक दबाब दिने काम हामीबाट पनि हुन्छ भनेर कसैले नसोचे हुन्छ,” उहाँले भन्नुभयो, “जनताले दिएको यो अभिमत जनताको हुर्मत लिनका लागि कसैबाट पनि दुरुपयोग हुँदैन।”

सभापति लामिछानेले समाजले औँल्याएका कमजोरीहरूलाई स्वीकार गरेर सुधारको मार्गमा अघि बढ्नु नै राजनीतिक परिपक्वता भएको उल्लेख गर्नुभयो। आफूहरू सत्तामा पुग्यौँ भन्दैमा ठालू पल्टिने वा अहंकारी बन्ने छुट कसैलाई नभएको र यो रास्वपाको राजनीतिक चरित्रसमेत नरहेको उहाँले प्रस्ट पार्नुभयो।

साथै, पार्टी र सरकारबीचको सम्बन्धमा दरार पैदा गर्ने उद्देश्यले विभिन्न पक्षबाट अफवाहहरू फैलाउने काम भइरहेकोतर्फ सचेत गराउँदै त्यस्ता भ्रामक कुराहरूमा विश्वास नगर्न नेता तथा कार्यकर्ताहरूलाई आह्वान गर्नुभयो।

सुशासन, जवाफदेहिता र पारदर्शी राजनीतिक संस्कृतिको पैरवी गर्दै आएको रास्वपाका सभापति लामिछानेको यो अभिव्यक्तिले पार्टीपंक्तिलाई अनुशासन र जनउत्तरदायी बन्न कडा सन्देश दिएको छ।