एनपीएल: लुम्बिनी लायन्सको अपराजित यात्रामा ब्रेक लगाउँदै काठमान्डु गोर्खाजको लगातार तेस्रो जित

काठमाडौँ, कात्तिक २१ गते । नेपाल प्रिमियर लिग (एनपीएल) मा उत्कृष्ट प्रदर्शन गर्दै आएको लुम्बिनी लायन्सको अपराजित यात्रामा पूर्णविराम लगाउँदै काठमान्डु गोर्खाजले शनिबार शानदार तेस्रो जित दर्ता गरेको छ।

कीर्तिपुरस्थित त्रिवि क्रिकेट मैदानमा भएको खेलमा डेविड वार्नरको उत्कृष्ट अर्धशतक तथा बलरहरूको अनुशासित प्रदर्शनको मद्दतले काठमान्डुले साविक विजेता लुम्बिनीलाई ३६ रनले पराजित गरेको हो।

पहिलो खेलमा पराजय बेहोरेको काठमान्डुले त्यसयता लगातार तेस्रो जित हात पार्दै ४ खेलबाट ६ अंकका साथ रनरेटमा सुदूरपश्चिमलाई पछि पार्दै दोस्रो स्थानमा उक्लिएको छ भने हारका बावजुत पनि लुम्बिनी ५ खेलबाट ७ अंकसहित शीर्ष स्थानमै कायम छ।

टस हारेर पहिले ब्याटिङको निम्तो पाएको काठमान्डुले निर्धारित २० ओभरमा ८ विकेट गुमाउँदै १ सय ६० रनको योगफल तयार पारेको थियो। अष्ट्रेलियन स्टार ब्याटर डेविड वार्नरले ५० बलमा ९ चौका र १ छक्का प्रहार गर्दै सर्वाधिक ६६ रन बनाउनुभयो भने विकेटकिपर साहिल पटेलले ३८ र सहान अराचिगेले नटआउट ३४ रनको योगदान दिए।

पहिलो विकेटका लागि वार्नर र पटेलले १ सय ४ रनको शतकीय साझेदारी गर्दै उत्कृष्ट सुरुवात दिलाए पनि मध्यक्रमका ब्याटरहरू सस्तैमा आउट हुँदा काठमान्डु ठूलो स्कोर बनाउनबाट चुक्यो। लुम्बिनीका लागि रुबेन ट्रम्पलम्यान, शेर मल्ल र अभिशेष गौतमले समान २–२ विकेट लिए।

जवाफमा १ सय ६१ रनको विजयलक्ष्य पछ्याएर मैदान उत्रिएको लुम्बिनीले पावर प्लेभित्रै आफ्ना महत्त्वपूर्ण ६ विकेट गुमाउँदै खराब सुरुवात गर्‍यो। जहानदाद खानले पहिलो स्पेलमै घातक बलिङ गर्दै ४ विकेट लिएर लुम्बिनीको शीर्ष तथा मध्यक्रमलाई ध्वस्त पारे। यद्यपि, पाँचौँ नम्बरमा ब्याटिङ गर्न आएका सन्दीप जोराले ४५ बलमा ४४ रन र अभिशेष गौतमले १७ रन बनाएर टिमको स्कोर उकास्ने प्रयास गरे पनि १९.३ ओभरमा १ सय २१ रन मात्र बनाउँदै लुम्बिनी अलआउट हुन पुग्यो।

काठमान्डुका लागि जहानदाद खानले ४ ओभरमा २३ रन खर्चेर सर्वाधिक ४ विकेट लिए भने कप्तान करण केसीले २ विकेट हात पारे। यस जितसँगै एनपीएलको यस सिजनमा प्रतिस्पर्धा थप रोचक बन्दै गएको छ।