तिहारको लक्ष्मीपूजाका दिन विद्युत्को अधिकतम माग १७ सय मेगावाट हुने, आन्तरिक उत्पादनले नै पर्याप्त पुग्ने प्राधिकरणको दाबी

काठमाडौँ, कात्तिक २१ गते । नेपाल विद्युत् प्राधिकरणले चालू वर्षको तिहारको लक्ष्मीपूजाका दिन साँझ विद्युत्को अधिकतम माग करिब १ हजार ७०० मेगावाटको हाराहारीमा पुग्ने अनुमान गरेको छ।

चाडपर्वका समयमा बत्तीको खपत बढ्ने भए पनि यसपटक आवश्यक पर्ने सम्पूर्ण विद्युत् आन्तरिक उत्पादनबाटै पर्याप्त रूपमा उपलब्ध हुने प्राधिकरणका कार्यकारी निर्देशक दीर्घायुकुमार श्रेष्ठले जानकारी दिनुभएको छ। सो अवधिमा कुल आन्तरिक विद्युत् उत्पादन करिब २ हजार ५०० मेगावाट पुग्ने प्रक्षेपण गरिएको छ, जसले गर्दा मागभन्दा उत्पादन बढी भई आपूर्ति प्रणाली अत्यन्तै सहज र भरपर्दो बन्ने दाबी गरिएको छ।

तिहार तथा छठ पर्वका अवसरमा आम उपभोक्ताहरूलाई निर्बाध, नियमित र गुणस्तरीय विद्युत् सेवा उपलब्ध गराउन प्राधिकरणले विशेष तयारी र सुरक्षात्मक प्रबन्ध मिलाएको छ। पर्वको समयमा विद्युत् आपूर्तिमा कुनै किसिमको अवरोध हुन नदिन आवश्यक पर्ने सम्पूर्ण पूर्वतयारी गर्न कार्यकारी निर्देशक श्रेष्ठले मातहतका सबै कार्यालय प्रमुखहरूलाई कडा निर्देशन दिनुभएको छ।

साथै, लाइनमा कुनै समस्या वा आकस्मिक अवरोध देखिएमा तत्काल मर्मतसम्भार गरी सेवा सुचारु गर्न विशेष प्राविधिक टोलीलाई हरबख्त तयारी अवस्थामा राखिएको छ।

विद्युत् प्रसारण लाइन तथा वितरण प्रणालीको नियमित निरीक्षण, जीर्ण संरचनाको मर्मतसम्भार र सम्भावित अवरोध न्यूनीकरणका कामहरू समयमै सम्पन्न गर्न पनि निर्देशन जारी गरिएको छ। उपभोक्ताहरूबाट विद्युत् आपूर्तिको सम्बन्धमा आउने गुनासो तथा समस्याहरूलाई तत्काल सम्बोधन गर्न ‘नो लाइट‘ सेवाका टेलिफोनहरू नियमित रूपमा सञ्चालन गर्न र गुनासो व्यवस्थापनलाई थप प्रभावकारी बनाउन समेत सम्बन्धित अधिकारीहरूलाई निर्देश गरिएको छ।

यस प्रकारको प्रभावकारी व्यवस्थापनले चाडपर्वको उल्लासपूर्ण समयमा उपभोक्ताहरूलाई अन्धकारमुक्त र गुणस्तरीय विद्युत् सेवाको प्रत्याभूति दिने विश्वास लिइएको छ।