सामराको आक्रामक शतकमा पोखरा एभेन्जर्सको पहिलो जित : कर्णाली याक्स ६३ रनले पराजित

काठमाडौँ, कात्तिक २३ गते । क्यानेडियन ओपनर युवराज सामराको विस्फोटक ब्याटिङ तथा आक्रामक शतकको मद्दतमा पोखरा एभेन्जर्सले नेपाल प्रिमियर लिग (एनपीएल) क्रिकेटमा पहिलो विजय हात पारेको छ। यसअघि लगातार चार खेलमा पराजित भएको पोखराले सोमबार भएको खेलमा कर्णाली याक्सलाई ६३ रनको फराकिलो अन्तरले पराजित गरेको हो।

टस जितेर पहिले ब्याटिङ रोजेको पोखराले निर्धारित २० ओभरमा ३ विकेट गुमाउँदै २ सय १७ रनको विशाल योगफल तयार पारेको थियो, जुन यस सिजनमा कुनै पनि टोलीले बनाएको पहिलो २ सयभन्दा बढीको स्कोर हो।

कीर्तिपुरस्थित त्रिवि अन्तर्राष्ट्रिय क्रिकेट मैदानमा जवाफी ब्याटिङका लागि उत्रिएको कर्णाली याक्सले १८.३ ओभरमा अलआउट हुँदै १ सय ५४ रन मात्र बनाउन सक्यो। खेलमा म्यान अफ द म्याच बनेका सामराले ४८ बल खेल्दै १० चौका र ६ छक्काको मद्दतमा १ सय २ रन बनाए। यो यस सिजनको पहिलो व्यक्तिगत शतकसमेत हो। उनीसँगै कुशल भुर्तेलले ३९ बलमा ६२ रनको उत्कृष्ट अर्धशतकीय पारी खेल्दै दोस्रो विकेटका लागि १ सय ३६ रनको साझेदारी गरे भने कप्तान चामिका करुणारत्नेले ११ बलमै अविजित ३५ रन जोडे।

लक्ष्य पछ्याउने क्रममा कर्णालीका लागि पवन सर्राफले सर्वाधिक ३२ रन बनाए पनि अन्य ब्याटरहरूले गतिलो योगदान दिन सकेनन्। आरिफुल इस्लामले २४, दीपक डुम्रेले २२ र कप्तान सोमपाल कामीले २१ रन बनाएका थिए। कर्णालीका ब्याटर सोमपाल ‘अब्स्ट्रक्टिङ द फिल्ड’ को अनौठो नियममा पर्दै आउट हुन पुगे। पोखराको बलिङतर्फ माहेदी हसनले ३ विकेट लिए भने धनञ्जय लक्षण, कुशल भुर्तेल र विपिन खत्रीले समान २–२ विकेट हात पारे।

यस जितसँगै पोखराले प्रतियोगितामा आफ्नो पहिलो अंक जोड्दै प्ले–अफको गणितीय सम्भावनालाई जीवित राखेको छ भने कर्णालीले लगातार तेस्रो हार बेहोर्नुपरेको छ।