मौलिक चाडपर्वहरूले सामाजिक एकता र सहिष्णुताको भावनालाई बलियो बनाउन प्रेरित गर्छन् : प्रधानमन्त्री वालेन्द्र शाह

काठमाडौँ, कात्तिक २४ गते । प्रधानमन्त्री वालेन्द्र शाहले नेपाल संवत् ११४७ (न्हूदँया भिन्तुना) तथा म्हः पूजाको सु-अवसरमा देश तथा विदेशमा रहनुहुने सम्पूर्ण नेपाली आमा-बुवा, दाजु-भाइ तथा दिदी-बहिनीहरूमा सुख, शान्ति, समृद्धि र उत्तरोत्तर प्रगतिको मङ्गलमय शुभकामना व्यक्त गर्नुभएको छ।

उहाँले आफ्ना शुभकामना सन्देशमार्फत हाम्रा मौलिक चाडपर्वहरूले सबै प्रकारका रिस-राग र मन-मुटाव बिर्सेर आपसी सामाजिक एकता र सहिष्णुताको भावनालाई सधैँ बलियो बनाउन प्रेरित गर्ने धारणा राख्नुभएको छ। राष्ट्रिय विभूति शङ्खधर साख्वाःले देशका गरिब जनतालाई ऋणमुक्त गरेर सुरुवात गर्नुभएको नेपाल संवत् हाम्रो चन्द्रमामा आधारित मौलिक समयचक्र र पहिचान भएको उहाँले उल्लेख गर्नुभएको छ।

नेवार समुदायमा हर्षोल्लासपूर्वक मनाइने ‘म्हः पूजा’ को दार्शनिक मर्म अत्यन्त गहिरो रहेको चर्चा गर्दै प्रधानमन्त्री शाहले ‘म्हः’ अर्थात् आफ्नै देह र शरीरभित्रको चेतनालाई साक्षी राखेर, अष्टचिरञ्जीवीको प्रतीक मण्डपमा आफैँले आफैँलाई पूजा गर्ने यस अनुपम परम्पराले आत्मशुद्धि र आन्तरिक चेतनाको बोध गराउने बताएका छन्। यस मौलिक परम्पराले समुदायभित्र आपसी सद्भाव, उच्च आत्मबल र पुख्र्यौली संस्कृतिको जगेर्ना गर्दै जातीय एकतालाई अझ प्रगाढ बनाउने गरेको र यो सबै नेपालीका लागि गौरवान्वित विषय भएको उहाँको भनाइ छ।

यसै दिन भगवान् श्रीकृष्णले गोवर्धन पर्वत उठाएर द्वारिकावासीलाई बचाउनुभएको पौराणिक मान्यतासँगै कृषिकर्मका सहयात्री गोरुलाई पिठो, नुन र बावर खुवाइने तथा हलो, फालीसहितका कृषि औजारहरूको विधिपूर्वक पूजा गरी गोवर्धन पूजा तथा हली तिहार मनाइने परम्परा रहेको उहाँले औँल्याउनुभएको छ।

साथै, भैलो र देउसेहरूको उल्लासमय स्वर तथा आशीर्वादले छर-छिमेकमा आपसी आत्मीयता र भाइ-चाराको सम्बन्ध थप प्रगाढ बनाउने उहाँले शुभकामना सन्देशमा उल्लेख गर्नुभएको छ।

अन्ततः, नेपालका यी विविधतायुक्त मौलिक चाडपर्वहरूले सम्पूर्ण नेपालीबीचको सद्भाव र बन्धुत्वको भावनालाई थप उचाइमा पुर्याउने विश्वास प्रधानमन्त्री शाहले व्यक्त गर्नुभएको छ।