पार्टीमा रहेर अन्य दललाई भोट दिएमा कडा कारबाही हुन्छ : अध्यक्ष केपी शर्मा ओली

काठमाडौँ, कात्तिक २८ गते । नेकपा (एमाले) का अध्यक्ष केपी शर्मा ओलीले पार्टीमा बसेर अन्य दलका उम्मेदवारलाई मतदान गरेको प्रमाण भेटिए त्यस्ता सदस्यमाथि कडा कारबाही गरिने चेतावनी दिनुभएको छ।

एमाले बागमती प्रदेश सङ्गठन कमिटीको तेस्रो पूर्ण बैठकलाई च्यासलस्थित पार्टी मुख्यालयमा सम्बोधन गर्दै अध्यक्ष ओलीले पार्टीभित्र मौलाएको अन्तर्घात र बेइमानी गर्ने प्रवृत्तिको अन्त्य गर्नुपर्ने आवश्यकता औँल्याउनुभयो। त्यस्तो शङ्कास्पद वा दोषी गतिविधिमा संलग्न भएको पाइएमा तुरुन्त स्पष्टीकरण सोधिने, छानबिन गरिने र दोषी ठहरिए कडा कारबाहीको दायरामा ल्याइने उहाँको भनाइ थियो।

नजिकिँदै गरेको स्थानीय तहको निर्वाचनलाई लक्षित गर्दै अध्यक्ष ओलीले पार्टीका सम्पूर्ण नेता तथा कार्यकर्ताहरूलाई आपसी अन्तर-विरोध र मन-मुटावहरूलाई आन्तरिक छलफलमार्फत हल गर्दै पूर्ण रूपमा एकताबद्ध भएर चुनावी अभियानमा केन्द्रित हुन निर्देशन दिनुभयो। पार्टीमा रहेर कसैलाई पनि अनुशासनहीनता र बेइमानी गर्ने छुट नभएको बताउँदै उहाँले सबै तहका कमिटीहरूलाई सक्रिय रूपमा खट्न आग्रह गर्नुभयो।

बैठकमा एमाले सचिव एवं बागमती प्रदेश इन्चार्ज महेश बस्नेतले आगामी स्थानीय तहको निर्वाचनको रणनीतिक तयारी र मङ्सिर २ तथा ३ गते काठमाडौँमा आयोजना हुने विशेष भेलाको व्यवस्थापन लगायतका विषयमा विस्तृत जानकारी प्रस्तुत गर्नुभएको थियो।

अध्यक्ष ओलीको यो कडा निर्देशनले स्थानीय निर्वाचनको सङ्घारमा पार्टीभित्र अनुशासन कडाइका साथ पालना गराउने र आन्तरिक एकता सुदृढ गर्ने सन्देश दिएको छ।