विपद् व्यवस्थापनका लागि राजनीतिक एकता: रास्वपा सभापति लामिछानेद्वारा सर्वदलीय बैठक आह्वान

काठमाडौँ, भदौ ३० गते । राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा भोलि बुधबार सर्वदलीय बैठक बस्ने भएको छ। देशमा बढ्दो प्राकृतिक विपद्का घटनाहरू र त्यसको पूर्वतयारी तथा व्यवस्थापनलाई एकीकृत रूपमा अगाडि बढाउने उद्देश्यले यो बैठक डाकिएको हो।

रास्वपाका प्रवक्ता जगदीश खरेलका अनुसार उक्त महत्वपूर्ण बैठक बुधबार बिहान ११:०० बजे सिंहदरबारस्थित रास्वपा संसदीय दलको कार्यालयमा आयोजना हुनेछ। बैठकमा संसद्मा प्रतिनिधित्व गर्ने प्रमुख राजनीतिक दलका शीर्ष नेताहरूको सहभागिता रहने निश्चित भएको छ।

यस बैठकको मुख्य एजेण्डा विपद् जोखिम न्यूनीकरण तथा व्यवस्थापनका लागि एउटा शक्तिशाली ‘उच्चस्तरीय राजनीतिक संयन्त्र‘ गठन गर्नु रहेको छ। विपद्को समयमा दलीय स्वार्थभन्दा माथि उठेर प्रभावकारी उद्धार, राहत र पुनस्थापनाका लागि दलीय समन्वय आवश्यक रहेको महसुस गरी यो पहल गरिएको हो।

सबै शीर्ष नेतृत्वलाई एकै ठाउँमा ल्याएर विपद् व्यवस्थापनमा साझा दृष्टिकोण बनाउने रास्वपाको यो कदमलाई राजनीतिक वृत्तमा निकै अर्थपूर्ण रूपमा हेरिएको छ। बैठकले विपद् व्यवस्थापनका लागि ठोस रणनीति र उच्चस्तरीय संयन्त्रको खाका तयार पार्ने अपेक्षा गरिएको छ।