रसुवा र आसपासका भोटेकोशी हिमबाढीपीडितको आफ्नै घरमा पुनर्स्थापना सुरु: लेदो पन्छाएर बस्नयोग्य बनाइँदै

काठमाडौँ, भदौ ३० गते । सरकारले भदौ १० गते रसुवाको भोटेकोशीमा आएको हिमबाढीबाट प्रभावित भएका स्थानीयहरूलाई आफ्नै घरको लेदो र ढुङ्गा-माटो पन्छाएर पुनः बसोबास गराउने कार्य सुरु गरेको छ।

धादिङ, नुवाकोट र रसुवा जिल्ला प्रशासन कार्यालयको सक्रियतामा पूर्ण रूपमा क्षति नभएका पक्की घरहरूको पहिचान गरी नेपाली सेना, नेपाल प्रहरी, सशस्त्र प्रहरी र स्वयंसेवकहरूको सहयोगमा सफाइ अभियान सञ्चालन भइरहेको छ। कतिपय स्थानमा दुई तलासम्म पुरिएका घरका केही कोठा सफा गरेर तथा भाडामा व्यवस्था मिलाएर पीडितहरूलाई पुनर्स्थापित गरिँदैछ।

धादिङका ५४२ प्रभावित घरधुरीमध्ये करिब एक सय घर सफा गरी बस्नयोग्य बनाउने काम सुरु भइसकेको छ।

यद्यपि, नुवाकोटको विदुर नगरपालिकामा १ हजार ७१० घर प्रभावित भएकोमा ३०० घर आंशिक क्षति भएका छन्, तर जनशक्तिको अभावका कारण सबै लेदो पन्छाएर पुनर्स्थापना गर्न कठिनाइ भइरहेको छ।

अर्कोतर्फ, रसुवाको उत्तरगया गाउँपालिकामा ६९२ प्रभावित घरधुरीमध्ये ६१३ परिवार पूर्ण रूपमा विस्थापित भएकाले त्यहाँ लेदो पन्छाएर बस्न सकिने घरहरू नभएको र पीडितहरू टहरा बनाएर बसोबास गरिरहेका छन्।

सरकारले बाढीबाट अत्यधिक प्रभावित रसुवा, नुवाकोट, धादिङ, गोरखा र तनहुँसहित १५ जिल्लालाई ‘विपत् सङ्कटग्रस्त क्षेत्र‘ घोषणा गरी उद्धार, राहत तथा पुनर्स्थापनालाई प्राथमिकताका साथ अघि बढाएको छ।