इन्द्रजात्राका लागि हनुमानढोकामा ठड्याइने ३६ हाते लिङ्गो भोटाहिटी ल्याइयो: यस्ता छन् साइत र विधि

काठमाडौँ, भदौ ३१ गते । काठमाडौँको ऐतिहासिक तथा सांस्कृतिक पर्व इन्द्रजात्रा (येँया पुन्ही) को तयारी सुरु भएको छ।

जात्राका लागि हनुमानढोका दरबार परिसरमा उठाइने ३६ हात लामो लिङ्गो (इन्द्रध्वज) भक्तपुरको चित्तपोलस्थित वनबाट काटेर काठमाडौँको भोटाहिटी ल्याइएको छ। केन्द्रीय मानन्धर सङ्घको अगुवाइमा ल्याइएको सो लिङ्गो असोज ३ गते हनुमानढोका प्रवेश गराइनेछ।

मानन्धर गुठीका बद्रीनारायण मानन्धरका अनुसार नेपाल पञ्चाङ्ग निर्णायक समितिले तय गरेको साइत अनुसार भदौ २८ गते वनयात्रा गरी रुख काट्ने काम सुरु गरिएको थियो। असोज ३ गते शनिबार बिहान ८:०५ बजे लिङ्गोलाई नगरप्रवेश गराई हनुमानढोकामा राखिनेछ भने असोज ७ गते बुधबार बिहान ७:४७ बजे द्वादशीका दिन लिङ्गो उठाइनेछ। लिङ्गो ठड्याएपछि इन्द्रजात्राको आधिकारिक सुरुवात हुने परम्परा छ।

इन्द्रजात्राको मुख्य आकर्षण मानिने कुमारी जात्रा र रथयात्रा आगामी असोज ९ गते परेको छ। जात्राका क्रममा काठमाडौँका माथिल्लो, तल्लो र बिचका टोलहरूमा रथयात्रा गराइनेछ। असोज १० गते मूल जात्रा, असोज ११ गते तल्लो टोल जात्रा र असोज १३ गते नानिचा जात्रा (बिचको टोल) सम्पन्न गरी सोही दिन राति ९:२५ बजे इन्द्रध्वज पातलन (ढालिने) गरेपछि साताव्यापी इन्द्रजात्रा विधिवत् समापन हुनेछ।

मल्ल राजा जयप्रकाश मल्लको पालादेखि सुरु भएको मानिने यो जात्रा काठमाडौँ उपत्यकाको दसैँभन्दा ठुलो पर्वका रूपमा मनाइन्छ। जात्राभरि भक्तपुरको महाकाली नाच, किलागलको पुलुकिसी, हल्चोकको भैरव, मजिपाटको लाखे र १० अवतार जस्ता परम्परागत सांस्कृतिक नाचहरू प्रदर्शन गरिनेछ।

इन्द्रजात्रा तथा लिङ्गोसम्बन्धी प्रमुख साइत र कार्यसूची: