नेपाल वायुसेवा निगमको वाइडबडी ‘मकालु’ जहाज इटालीमा रोकियो: अटो ब्रेकिङ सिस्टमको खराबीले मर्मत लम्बियो

काठमाडौँ, भदौ ३० गते । नेपाल वायुसेवा निगमको वाइडबडी नाइन एन एलजेट ‘मकालु’ जहाज नियमित विस्तृत परीक्षण (सी–चेक) का लागि साउन २४ गते इटाली पठाइएकोमा ३५ दिनदेखि उतै रोकिएको छ।

साउन २४ गते दुबई हुँदै इटाली पुगेको उक्त जहाज भदौ १५ गते नेपाल फर्किने तालिका भए पनि परीक्षणका क्रममा दायाँ इन्जिनको अटो ब्रेकिङ सिस्टममा खराबी भेटिएपछि इटालीको ‘एसपी एटिटेक‘ कम्पनीमै ग्राउन्डिङ भएको हो।

निगमका प्राविधिक प्रवक्ता देवेन्द्र पुनका अनुसार सी–चेकका क्रममा जहाजको संरचना, इन्जिन, ल्यान्डिङ गियर, हाइड्रोलिक र एभियोनिक्स प्रणाली परीक्षण गर्दा आवश्यक पार्ट फेर्नुपर्ने देखिएको थियो। तर, उक्त पार्ट तत्काल इटालीमा उपलब्ध हुन नसकेकाले जहाजको नेपाल फर्किने अवधि लम्बिन पुगेको छ।

निगमले यसअघि पनि सोही मर्मत कम्पनीमा आफ्ना वाइडबडी जहाजको सी-चेक गराउँदै आएको थियो।