मौसममा सुधार आएसँगै धवलागिरि हिमालको शरद-कालीन आरोहण पुनः सुरु

म्याग्दी, असोज २४ गते । प्रतिकूल मौसम तथा भारी हिमपातका कारण केही समयका लागि स्थगित भएको ८,१६७ मिटर अग्लो धवलागिरि हिमालको शरदकालीन आरोहण पुनः सुरु भएको छ। असोजको पहिलो साता आधार शिविरबाट फर्किएको आरोहण टोली मौसममा आएको सुधारसँगै पुनः आधार शिविर फर्किएर हिमाल आरोहणको तयारीमा जुटेको हो।

असोज ८ देखि ११ गतेसम्म भएको लगातारको वर्षा र हिमपातका कारण आधार शिविर हिउँले पुरिएको थियो। हाल मौसममा सुधार आएपछि हिउँ पन्छाउने, शिविर व्यवस्थित गर्ने काम सम्पन्न भएको पर्यटन व्यवसायी इन्द्रसिंह शेरचनले जानकारी दिनुभएको छ।

सेभेन समिट ट्रेक्सका टोली प्रमुख लाक्पा शेर्पाका अनुसार डोरी टाँग्ने (रोप फिक्सिङ) टोली क्याम्प दुईभन्दा करिब ४०० मिटर माथि पुगिसकेको छ। हालैको हिमपातले अस्थिर हिउँ हटाएको र कडा हिउँ जमेका कारण हिमपहिरोको जोखिम पनि कम भएको आरोहीहरूको भनाइ छ।

शरदकालमा धवलागिरि आरोहणका लागि ४ समूहका ३४ जनाले अनुमति लिएका छन् भने पर्यटन विभागले यसबाट ७७ लाख ४२ हजारभन्दा बढी रोयल्टी सङ्कलन गरेको छ। सन् १९६० मा पहिलो पटक सफल आरोहण भएको यस हिमालमा हालसम्म ७३३ जनाले शिखर चुगिसकेका छन्। हिमाल आरोहणसँगै यस क्षेत्रमा ‘राउन्ड धवलागिरि’ पदयात्राको समेत आकर्षण रहेको छ।