दसैँ सकिएर काठमाडौँ फर्किनेहरूको बढ्यो चाप : प्रमुख नाकाहरूमा सवारीसाधनको लामो लाइन

काठमाडौँ, कात्तिक ६ गते । दसैँ मनाउन काठमाडौँ उपत्यकाबाट बाहिरिएका यात्रुहरू धमाधम फर्किन थालेपछि उपत्यका भित्रिने प्रमुख नाकाहरूमा सवारीसाधनको चाप उच्च रूपमा बढेको छ।

दसैँको टीका तथा आशिष लिएर घरबाट फर्किनेहरूको घुइँचो लागेसँगै नागढुङ्गा–कलङ्की, जडीबुटी–कोटेश्वर, तीनपिप्ले, भक्तपुरको जगाती, भट्टेडाँडा तथा दक्षिणकाली–फर्पिङ लगायतका प्रमुख सडकखण्डहरूमा यातायातको अत्यधिक दबाब देखिएको काठमाडौँ उपत्यका ट्राफिक प्रहरी कार्यालयले जनाएको छ।

यात्रुहरूको आवागमनलाई सहज बनाउन, सवारी चापलाई व्यवस्थित गर्न र सम्भावित दुर्घटनाहरूलाई न्यूनीकरण गर्न ट्राफिक प्रहरीले सडकमा विशेष निगरानी तथा जनशक्ति परिचालन गरेको छ। कार्यालयका प्रमुख एवं प्रहरी वरिष्ठ उपरीक्षक सुरेशप्रसाद काफ्ले तथा प्रवक्ता नरेशराज सुवेदीका अनुसार उपत्यकाका मुख्य नाकाहरूमा दैनिक रूपमा निजी सवारीदेखि साना–ठूला सार्वजनिक साधनहरूको ठूलो आवतजावत हुने गरेको छ, जसलाई व्यवस्थित गर्न प्रहरी सक्रिय रूपमा खटिएको छ।

काठमाडौँ उपत्यका ट्राफिक प्रहरी कार्यालयको तथ्याङ्क अनुसार यस वर्षको दसैँ मनाउन घटस्थापनादेखि कात्तिक ३ गतेसम्म ७९ हजार ६७६ वटा सवारीसाधनमार्फत ५ लाख ७६ हजार ५७८ जनाले उपत्यका छोडेका थिए। अहिले ती यात्रुहरू फर्कने क्रम सुरु भएकाले आगामी केही दिनसम्म नाकाहरूमा यातायातको चाप अझै बढ्ने देखिएको छ।