२ करोड बजेटको ‘हनुमान अंश’ को अभूतपूर्व सफलता: ४५ दिनमा ३४७ करोडको विश्वव्यापी व्यापार, हलबाट नउत्रिने सङ्केत

काठमाडौँ, असोज ५ गते । सार्वजनिक प्रदर्शनमा आएको ४५ दिन बितिसक्दा पनि भारतीय फिल्म ‘हनुमान अंश’ सिनेमा हलहरूबाट उत्रने कुनै छाँटकाँट देखाएको छैन। बरु यसपछि प्रदर्शनमा आएका अधिकांश फिल्महरू हलबाट हटिसकेका छन्।

यतिबेला हलमा लागिरहेका ठूला बजेटका र बहुचर्चित फिल्महरू ‘मिर्जापुर’ र ‘हेवान’ ले समेत बक्स अफिसमा ‘हनुमान अंश’ सँग कडा व्यापारिक सङ्घर्ष गरिरहेका छन्।

नीम करोली बाबाको जीवनीमा आधारित रहेर विशाल चतूर्वेदीले निर्देशन गरेको यस फिल्मले आइतबार प्रदर्शनको ४५ औँ दिनमा १३ करोड ७५ लाख भारुको शानदार कमाइ गरेको छ। भारतीय फिल्म व्यापारको आँकडा सार्वजनिक गर्ने संस्था ‘सेकनिल्क’ का अनुसार यस फिल्मले हालसम्म विश्वव्यापी रूपमा ३ सय ४७ करोड भारुको कुल व्यापार (ग्रोस कलेक्सन) गरिसकेको छ, जसमध्ये भारतमा खुद कमाइ (नेट कलेक्सन) मात्रै झन्डै २ सय ७२ करोड भारु रहेको छ।

रोचक कुरा के छ भने, रिलिजको पहिलो दिन (७ अगस्ट) मा फिल्मले मात्र १० लाख भारुको व्यापार गरेको थियो। तेस्रो सातादेखि यसको व्यापारमा अप्रत्याशित रफ्तार आएको हो। मात्र २ करोड भारुको न्यून बजेटमा निर्माण भएको ‘हनुमान अंश’ भारतमा यसवर्षको सर्वाधिक कमाइ गर्ने तेस्रो फिल्म बनिसकेको छ भने भारत बाहिर (अन्तर्राष्ट्रिय बजार) बाट हालसम्म २६ करोड भारु सङ्कलन गरिसकेको छ।

‘हनुमान अंश’ को व्यापारिक दबदबाका अगाडि हालै रिलिज भएका नयाँ फिल्महरूसमेत सुस्त देखिएका छन्। करीना कपूर खान तथा पृथ्वीराज सुकुमारन स्टारर फिल्म ‘दायरा’ र कुणाल खेमू तथा प्रीति जिन्टा अभिनित ‘वाइब’ ले ओपनिङ विकेन्डमा कमजोर कमाइ गरेका छन्। यस्तै १७ औँ दिनमा पुगेको बहुप्रतीक्षित ‘मिर्जापुरः द मुभी’ ले भारतबाट २१५ करोड कमाए पनि तेस्रो सातासम्म आइपुग्दा यसको कमाइ दैनिक ५ करोडमा खुम्चिएको छ।