ऐतिहासिक दोधारा चाँदनी झोलुङ्गे पुल भत्किएपछि निराशा: तत्काल पुनर्निर्माण गर्न स्थानीय र जनप्रतिनिधिको माग

महेन्द्रनगर, असोज १६ गते । कञ्चनपुरको भीमदत्त र दोधारा चाँदनी नगरपालिका जोड्ने महाकाली नदीको ऐतिहासिक झोलुङ्गे पुलका पिल्लरहरू भत्किँदा स्थानीयवासी तथा व्यवसायीहरूमा गम्भीर निराशा छाएको छ।

वि.सं. २०६० मा निर्माण सम्पन्न भई दोधारा चाँदनीलाई मुलुकको मूलधारसँग जोड्ने यो पुलको तेस्रो पिल्लर एकाएक भत्किँदा हाल आवागमन पूर्ण रूपमा ठप्प भएको छ।

पुल भत्किएपछि दोधारा चाँदनीका पूर्व वडा सदस्य ७७ वर्षीय भीमबहादुर सिंह लगायत स्थानीयवासीले यसलाई केवल एउटा सडक सञ्जाल नभई क्षेत्रको प्रमुख ऐतिहासिक चिनारी गुमेको रूपमा व्यक्त गरेका छन्। दसैँ-तिहारको मुखमा पुलमा क्षति पुग्दा स्थानीय पर्यटन, व्यापार-व्यवसाय र दैनिक आवतजावत नराम्ररी प्रभावित भएको छ।

पुलस्थलको अनुगमन गर्दै सुदूरपश्चिम प्रदेशका उद्योग, पर्यटन, वन तथा वातावरणमन्त्री प्रकाश रावलले यो धरोहरलाई जोगाउन सबै तहका सरकारको सहकार्यमा चाँडोभन्दा चाँडो पुनर्निर्माण गरिने प्रतिबद्धता जनाउनुभयो।

त्यसैगरी पूर्वसांसद रमेश लेखक र भीमदत्त–१३ का वडाध्यक्ष रामबहादुर बोहराले पनि पुलको प्राविधिक जाँच गरी मर्मतसम्भार र पुनर्निर्माणमा ढिलाइ नगर्न जोड दिनुभएको छ।

एसियाकै दोस्रो लामो झोलुङ्गे पुलका रूपमा पहिचान बनाएको यो पुल निर्माण हुनुअघि स्थानीयवासीले भारतीय बाटो (बनवासा पुल) वा महाकालीमा जोखिमपूर्ण डुङ्गाको यात्रा गर्नुपर्ने बाध्यता थियो। हाल चार लेनको पक्की पुल सञ्चालनमा रहे पनि पर्यटकीय र सांस्कृतिक दृष्टिकोणले यो झोलुङ्गे पुलको ठुलो महत्व रहँदै आएको छ।