चलचित्र ‘कबड्डी ५ः आफ्टर द फाइनल म्याच’ : काजीको जीवनमा आउने हलचल र सम्झौताको नयाँ व्यावहारिक मोड

काठमाडौँ, असोज २१ गते । नेपाली चलचित्र क्षेत्रको बहुचर्चित शृंखला ‘कबड्डी‘ को पाँचौँ भाग ‘कबड्डी ५ः आफ्टर द फाइनल म्याच’ आगामी कात्तिक ६ गतेदेखि देशभरका चलचित्र घरहरूमा प्रदर्शनमा आउने तयारीमा छ। रामबाबु गुरुङको निर्देशनमा बनेको यस चलचित्रमा काजीको कथा र जीवनले लिने नयाँ व्यावहारिक मोडलाई प्रस्तुत गरिएको छ।

अभिनेता दयाहाङ राईका अनुसार अघिल्ला शृंखलाहरूमा काजीले मैयाँलाई पाउन गरेको संघर्षलाई मुख्य विषय बनाइएको भए पनि यसपटक प्रेम प्राप्तिपछिको व्यावहारिक जीवन, परिवार, समाज र साथीभाइप्रतिको जिम्मेवारीलाई केन्द्रमा राखिएको छ। मैयाँ फर्किंदा काजीको जीवनमा आउने हलचल र उनले गर्नुपर्ने सम्झौताहरू नै चलचित्रको मुख्य आकर्षण हुनेछन्।

यस शृंखलामा काजीको व्यक्तिगत जीवनका साथै बदलिँदो राजनीतिक परिवेश र त्यसले मानिसको मनोदशामा पार्ने प्रभावसमेत देख्न पाइनेछ। विगत १५ वर्षदेखि काजीको चरित्र निर्वाह गर्दै आएका दयाहाङ राईले यो पात्र अब पर्दाको पात्र मात्र नरहेर आफ्नै नजिकको साथी जस्तै लाग्न थालेको र भविष्यमा यी पात्रहरूको ६५ वर्षपछिको कथा बनाउने सोचसमेत रहेको बताएका छन्।

बाँसुरी फिल्म्सको प्रस्तुतिमा बनेको यस चलचित्रको कथा निर्देशक रामबाबु गुरुङ स्वयंले लेख्नुभएको हो। चलचित्रमा दयाहाङ राई, मिरुना मगर, विपिन कार्की, विजय बराल, बुद्धि तामाङ र रिश्मा गुरुङ लगायतका कलाकारहरूको मुख्य अभिनय रहेको छ।