चलचित्र ‘पाँच पाण्डव’ को पहिलो पोस्टर सार्वजनिक: कात्तिक २० गते प्रदर्शन हुने

काठमाडौँ, असोज ८ गते । वसन्त निरौलाको निर्देशनमा निर्माण भएको सोसल ड्रामा जनराको नेपाली चलचित्र ‘पाँच पाण्डव’ को पहिलो पोस्टर सार्वजनिक गरिएको छ। आगामी तिहारको अवसर पारेर कात्तिक २० गतेदेखि प्रदर्शनमा आउन लागेको यस चलचित्रको हाल पोस्ट प्रोडक्सनको काम तीव्र गतिमा भइरहेको छ।

सार्वजनिक पोस्टरमा महाभारतका पाँच पाण्डवको चरित्र र बिम्बमा समकालीन नेपाली समाजका मुख्य पाँच पात्रहरूलाई देखाइएको छ। पोस्टरमा युधिष्ठिरको भूमिकामा हरिवंश आचार्य, भीममा जितु नेपाल, अर्जुनमा आर्यन सिग्देल, नकुलमा महेश त्रिपाठी र सहदेवको भूमिकामा सुशील सिटौला प्रफुल्ल मुद्रामा प्रस्तुत भएका छन्।

काली रानी फिल्मस्को ब्यानरमा बनेको यस चलचित्रमा नेपाली सिने जगतका दिग्गज तथा नयाँ पुस्ताका चर्चित कलाकारहरूको अभिनय रहेको छ। चलचित्रमा दीपाश्री निरौला, सरिता गिरी, विनोद न्यौपाने, प्रशान्त ताम्राकार लगायतका कलाकारहरूको पनि महत्त्वपूर्ण भूमिका रहेको छ।

नवीन श्रेष्ठ प्रस्तुतकर्ता र काली रानी श्रेष्ठ निर्माता रहेको यस चलचित्रको कथा तथा सम्वाद सुशील पौडेलले लेख्नुभएको हो। निर्देशक निरौलाका अनुसार दर्शकले चलचित्र हलमा ‘फूल डल्बी एट्मस साउन्ड’ को उत्कृष्ट प्राविधिक अनुभव लिन पाउनेछन्।