डेढ महिनादेखि बन्द तातोपानी नाका तीन दिनका लागि अस्थायी रूपमा खुल्ने: कात्तिक १ देखि ३ गतेसम्म कार्गो ट्रक सञ्चालन हुने

काठमाडौँ, कात्तिक १ गते । डेढ महिनाभन्दा बढी समयदेखि बन्द रहेको सिन्धुपाल्चोकको तातोपानी नाका आगामी तीन दिनका लागि अस्थायी रूपमा सञ्चालनमा आउने भएको छ। प्राप्त जानकारी अनुसार आज कात्तिक १ गतेदेखि आगामी कात्तिक ३ गतेसम्म यो नाका खुला रहनेछ।

उद्योग, वाणिज्य तथा आपूर्तिमन्त्री दीपककुमार साहको विशेष पहलपछि चिनियाँ पक्षले नेपाली पक्षको आग्रहलाई सम्बोधन गर्दै नाका अस्थायी रूपमा खोल्ने निर्णय गरेको हो।

यस तीन दिनको अवधिमा केवल मालवाहक सवारी तथा कार्गो ट्रकहरूलाई मात्र आवतजावत गर्न अनुमति दिइनेछ। गत भदौ महिनामा आएको भोटेकोशीको बाढी र पहिरोका कारण रसुवा र तातोपानी दुवै नाका बन्द हुँदा दसैँलक्षित सामानहरू आयात हुन सकेको थिएन, जसले गर्दा बजारमा कृत्रिम अभाव र मूल्यवृद्धिसमेत देखिएको थियो।

चाडपर्वका बेला बजारमा वस्तु तथा सामग्रीको आपूर्तिलाई सहज बनाउन यो नाका अस्थायी रूपमा खुल्नु व्यवसायी तथा उपभोक्ताहरूका लागि ठुलो राहतको विषय बनेको मन्त्रालयले जनाएको छ।