नेपाली डकुमेन्ट्री ‘द एभरेस्ट ड्रीम’ लाई भारतमा ‘स्पेशल जुरी सर्ट डकुमेन्ट्री अवार्ड’: निर्देशक गणेश पाण्डे पुरस्कृत

काठमाडौं, असोज १२ गते । नेपाली डकुमेन्ट्री फिल्म ‘द एभरेस्ट ड्रीम’ ले भारतको शिम्लामा आयोजित १२ औँ अन्तर्राष्ट्रिय फिल्म फेस्टिभल अफ शिम्लामा ‘स्पेशल जुरी सर्ट डकुमेन्ट्री अवार्ड’ जितेको छ। निर्देशक तथा सञ्चारकर्मी गणेश पाण्डेद्वारा निर्देशित तथा निर्मित यस वृत्तचित्रले विश्वभरका अन्तर्राष्ट्रिय डकुमेन्ट्रीहरूसँग प्रतिस्पर्धा गर्दै यो सफलता हात पारेको हो।

सेप्टेम्बर २५ देखि २७ सम्म शिम्लाको ऐतिहासिक गेती हेरिटेज कम्प्लेक्समा आयोजित महोत्सवमा ३३ देशका फिल्महरू प्रदर्शन गरिएका थिए। अवार्ड समारोहमा हिमाञ्चल प्रदेशका गभर्नर कविन्दर गुप्ता र फेस्टिभल निर्देशक पुष्पराज ठाकुरले निर्देशक पाण्डेलाई संयुक्त रूपमा अवार्ड हस्तान्तरण गर्नुभयो।

‘द एभरेस्ट ड्रीम’ मा मस्तिष्कमा गम्भीर चोट लागेपछि जीवनमा अनेक चुनौती सामना गरिरहेका बेलायती नागरिकहरूको एभरेस्ट बेस क्याम्पसम्मको साहसिक यात्राको कथा प्रस्तुत गरिएको छ। जेम्स लेम्बको नेतृत्वमा पाँच जना ब्रेन इन्जुरी सर्वाइवर्ससहित सात सदस्यीय टोलीले स्कटल्याण्डबाट सुरु गरेको कठिन प्रशिक्षणदेखि नेपालका हिमालयसम्म गरेको यात्रालाई डकुमेन्ट्रीमा उतारिएको छ।

शारीरिक तथा मानसिक कठिनाइबीच पनि नयाँ सपना देख्न र पूरा गर्न सकिन्छ भन्ने प्रेरणादायी सन्देश बोकेको यस डकुमेन्ट्रीले यसअघि अमेरिकाको जर्जियास्थित ‘कब अन्तर्राष्ट्रिय फिल्म महोत्सव‘ मा पनि उत्कृष्ट डकुमेन्ट्री फिल्म अवार्ड जितिसकेको छ।