बक्स अफिसमा ‘झिँगेदाउ २’ को दबदबा: दोस्रो सातामा पनि दर्शकको उत्साहजनक साथ, शो संख्यामा वृद्धि

काठमाडौँ, असोज १० गते । गत असोज २ गतेदेखि देशभरका हलहरूमा प्रदर्शनरत नेपाली कथानक चलचित्र ‘झिँगेदाउ २’ ले दोस्रो सातामा पनि दर्शकको उत्साहजनक साथ पाइरहेको छ।

पारिवारिक कथावस्तु र मनोरञ्जनात्मक प्रस्तुतिका कारण चलचित्र दर्शकको पहिलो रोजाइमा पर्न सफल भएको निर्माण पक्षले जनाएको छ। पहिलो सातामा करिब डेढ करोड रुपैयाँ आसपासको व्यापार गरेको यो चलचित्रले दोस्रो साताको शनिबार पनि हलहरूमा दर्शकको ठूलो चाप देखेको छ।

ज्ञानेन्द्र देउजाको निर्देशनमा बनेको यो चलचित्रको कथा मुख्यतया जेठानी र देउरानीबिचको पारिवारिक झगडा र त्यसले सिर्जना गर्ने जटिल परिस्थितिको वरिपरि घुमेको छ। सामान्य देखिने पारिवारिक विवाद कसरी ठुलो द्वन्द्वमा परिणत हुन्छ र त्यसले सम्बन्धमा कस्तो असर पार्छ भन्ने विषयलाई मनोरञ्जनात्मक तथा भावनात्मक ढंगले पर्दामा उतारिएको छ। यसका साथै चलचित्रमा आमाको महत्त्व, माया र त्यागलाई पनि प्रमुखताका साथ प्रस्तुत गरिएको छ।

चलचित्र हेरेर निस्किएका दर्शकहरूले कथावस्तु, कलाकारहरूको अभिनय र गीतसङ्गीतको उच्च प्रशंसा गरेका छन्। सामाजिक सञ्जालमा सार्वजनिक प्रतिक्रियाहरूमा कतिपय दृश्यमा दर्शकहरू खुलेर हाँसेको त कतिपय भावनात्मक क्षणमा आँसु खसाल्दै हलबाट बाहिरिएको देखिएका छन्।

दर्शकको यही सकारात्मक प्रतिक्रिया र चापका कारण दोस्रो साताको शनिबार देशका विभिन्न हलहरूमा चलचित्र ‘झिँगेदाउ २‘ को शो संख्यामा समेत वृद्धि गरिएको वितरकले जनाएका छन्।

कपनगढी सिनेमा र फिल्म क्रिउ नेपालको ब्यानरमा निर्मित यस चलचित्रमा केकी अधिकारी, आँचल शर्मा, महेश त्रिपाठी, कुशल बिष्ट, आर्यन सिग्देल, सरोज खनाल, बसुन्धरा भुसाल लगायतका दिग्गज कलाकारहरूको अभिनय रहेको छ। सुलभ प्रतिक देउजा र समीक्षा देउजाको लगानी रहेको चलचित्रको पटकथा तथा संवाद परिच्छेद सेनको छ भने अर्जुन पोखरेलले यसमा सङ्गीत भर्नुभएको छ।