आईसीसी लिग–२: ओमानलाई १० रनले हराउँदै नेपाल छैटौँ स्थानमा उक्लिँदै जोायो ओडीआई मान्यता

काठमाडौँ, कात्तिक ३ गते । आइसिसी पुरुष विश्वकप क्रिकेट लिग–२ शृङ्खलाअन्तर्गत आफ्नो अन्तिम खेलमा नेपालले ओमानविरुद्ध १० रनको रोमाञ्चक जित निकालेको छ। यस जितसँगै नेपाल जारी शृङ्खलाको छैटौँ स्थानमा उक्लिँदै सिधै ओडीआई मान्यता जोगाउन सफल भएको छ।

ओमानको अल अमेरतस्थित क्रिकेट मैदानमा टस जितेर पहिले ब्याटिङ गरेको नेपालले निर्धारित ५० ओभरमा सबै विकेट गुमाउँदै २८० रनको बलियो योगफल तयार पारेको थियो। नेपालका लागि रोहितकुमार पौडेलले ८० रनको उत्कृष्ट कप्तानी पारी खेले भने दीपेन्द्रसिंह ऐरीले ६९ र देव खनालले ५७ रनको योगदान दिए। त्यसैगरी, ईशान पाण्डेले २९ र बसिर अहमदले १७ रन जोडेका थिए।

२८१ रनको विजयी लक्ष्य पछ्याएको ओमानले निर्धारित ५० ओभरमा ७ विकेट गुमाएर २७० रन मात्र बनाउन सक्यो। ओमानका लागि जतिन्दर सिंहले ८९ र हमाद मिर्जाले ८७ रन बनाए पनि नेपालका बलरहरूले अन्तिम समयमा उत्कृष्ट बलिङ गर्दै टिमलाई जिताए।

नेपालका लागि दीपेन्द्र सिंह ऐरी र ललित राजवंशीले समान दुई–दुई विकेट लिए भने कप्तान सन्दीप लामिछाने र नन्दन यादवले एक–एक विकेट हात पारे। यस जितसँगै नेपालले ३६ खेलमा १४ जित निकाल्दै कुल ३० अङ्कका साथ लिग–२ को छैटौँ स्थानमा आफ्नो यात्रा समाप्त गरेको छ।