दसैँमा घर फर्किने यात्रुको चाप तीव्र: घटस्थापनादेखि हालसम्म ५ लाख ७६ हजारभन्दा बढीले छाडे काठमाडौँ उपत्यका

काठमाडौँ, कात्तिक ३ गते । बडादसैँ मनाउन काठमाडौँ उपत्यकाबाट आफ्नो गृह जिल्ला तथा घरतर्फ फर्किने यात्रुहरूको चाप दिनहुँ बढ्दै गएको छ। घटस्थापनादेखि हालसम्म ७९ हजार ६७६ वटा सवारीसाधनमार्फत कुल ५ लाख ७६ हजार ५७८ जनाले काठमाडौँ उपत्यका छाडेका छन्।

काठमाडौँ उपत्यका ट्राफिक प्रहरी कार्यालयका अनुसार उपत्यकाबाट बाहिरिनेहरूमा २ लाख २७ हजार ७५५ जना महिला र ३ लाख ४८ हजार ८२३ जना पुरुष रहेका छन्।

अध्ययन, रोजगारी र व्यवसायको सिलसिलामा उपत्यकामा बसोबास गर्दै आएका नागरिकहरू दसैँ मनाउन आफ्नो जन्मथलो फर्किन थालेपछि नागढुङ्गा, फर्पिङ, साँखु, भक्तपुर लगायतका प्रमुख नाकाहरूमा सवारीसाधनको आवागमन बाक्लिएको छ।

उपत्यका ट्राफिक प्रहरी प्रमुख तथा प्रहरी वरिष्ठ उपरीक्षक सुरेशप्रसाद काफ्लेका अनुसार चाडपर्वका समयमा यात्रुको सुरक्षा सुनिश्चित गर्न, यातायात आवागमन सहज बनाउन र सवारी दुर्घटना न्यूनीकरण गर्न ट्राफिक प्रहरी चौबीसै घण्टा सडकमा खटिएको छ।

साथै, लामो दूरीको यात्रा गर्दा सवारीसाधनको अवस्था र चालकको सतर्कताबारे विशेष ध्यान दिन समेत प्रहरीले अनुरोध गरेको छ।