दसैँको महानवमी: वर्षमा एक दिन मात्र खुल्ने हनुमानढोकास्थित तलेजु भवानी मन्दिरमा भक्तजनको अपार घुइँचो

काठमाडौँ, कात्तिक ३ गते । बडादसैँको महानवमीका अवसरमा मंगलबार बिहानैदेखि काठमाडौंको हनुमानढोका दरबार क्षेत्रमा रहेको ऐतिहासिक तलेजु भवानी मन्दिरमा भक्तजनहरूको अत्यधिक घुइँचो लागेको छ।

वर्षमा एक पटक महानवमीको दिन मात्र खुल्ने भएकाले तलेजु भवानीको दर्शन, पूजा र आराधना गर्नका लागि देशका विभिन्न स्थानबाट लाखौँ भक्तजनहरू लामबद्ध भएका छन्।

परम्परा अनुसार महाअष्टमीको राति मूलचोकमा कालरात्रि पूजा गरी ५४ वटा बोका र ५४ वटा राँगाको बलि दिने गरिएको छ भने दसैँको महानवमीका दिन भक्तजनहरूका लागि मन्दिर खुला गरिएको हो। तलेजु भवानीलाई विजयादशमीका दिन बिहान मात्र पुन: मूल मन्दिरमा फर्काउने चलन रहेको छ।

वर्षको एक दिन मात्र खुला रहने यस पवित्र मन्दिरमा दर्शनार्थीहरूको सुरक्षा र सहजताका लागि विशेष प्रबन्ध मिलाइएको छ।