मौलिक संस्कृति, भाषा र परम्पराको संरक्षण गर्न प्रदेश सरकार प्रतिबद्ध छ : मुख्यमन्त्री किरण थापा मगर

काठमाडौँ, कात्तिक २४ गते । बागमती प्रदेशका मुख्यमन्त्री किरण थापा मगरले तिहार (दीपावली) तथा नेपाल संवत् ११४७ को सुअवसरमा स्वदेश तथा विदेशमा रहनुहुने सम्पूर्ण नेपाली दिदी-बहिनी तथा दाजु-भाइहरूमा सुख, शान्ति, समृद्धि, सु-स्वास्थ्य र उत्तरोत्तर प्रगतिको मङ्गलमय शुभकामना व्यक्त गर्नुभएको छ।

उहाँले आफ्नो शुभकामना सन्देशमार्फत नेपालको बहु-जातीय, बहु-भाषिक र बहु-सांस्कृतिक विविधता नै हाम्रो वास्तविक राष्ट्रिय पहिचान र अमूल्य सांस्कृतिक धरोहर भएको स्पष्ट पार्नुभएको छ। मौलिक संस्कृति, भाषा र परम्पराको संरक्षण तथा संवद्र्धन गर्न प्रदेश सरकार सधैँ कटिबद्ध रहेको प्रतिबद्धता उहाँले व्यक्त गर्नुभएको छ।

मुख्यमन्त्री थापा मगरले तिहार पर्वले मानव र प्रकृतिबीचको प्रगाढ सम्बन्धलाई जीवन्त रूपमा उजागर गर्नुका साथै देउसी-भैलोजस्ता हाम्रा मौलिक सांस्कृतिक परम्पराहरूको जगेर्ना र दिदी-बहिनी तथा दाजु-भाइबीचको आत्मीयता एवं पारिवारिक सम्बन्धलाई अझ प्रगाढ बनाउन महत्त्वपूर्ण भूमिका खेल्ने बताउनुभएको छ।

विभिन्न समुदायका यी मौलिक पर्व तथा ऐतिहासिक परम्पराहरूले नेपाली समाजमा आपसी भ्रातृत्व, भावनात्मक एकता र राष्ट्रिय गौरवको भावना अभिवृद्धि गर्न अतुलनीय योगदान पुर्‍याउँदै आएको उहाँको भनाइ छ। चाडपर्वहरूको यस पवित्र अवसरले नेपालीहरूबीचको सद्भाव, सहिष्णुता र आपसी एकतालाई थप मजबुत बनाउने विश्वास उहाँले लिनुभएको छ।

साथै, यस किसिमका मौलिक पर्वहरूले समाजमा सकारात्मक ऊर्जा सञ्चार गर्दै समृद्ध बागमती प्रदेश निर्माणको साझा यात्रामा एकजुट भएर अगाडि बढ्न सबैलाई प्रेरणा प्रदान गर्ने अपेक्षा मुख्यमन्त्री थापा मगरले गर्नुभएको छ।