एनपिएल : सुदूरपश्चिम रोयल्सद्वारा जनकपुर बोल्ट्स २७ रनले पराजित, प्ले अफ निश्चित

काठमाडौँ, कात्तिक २४ गते । कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको निकै प्रतिस्पर्धात्मक तथा ‘लो स्कोरिङ’ खेलमा सुदूरपश्चिम रोयल्सले जनकपुर बोल्ट्सलाई २७ रनले पराजित गरेको छ।

टस जितेर पहिलो ब्याटिङ गरेको सुदूरपश्चिमले निर्धारित २० ओभरमा ९ विकेट गुमाउँदै मात्र १ सय २० रन बनाएको थियो। सामान्य लक्ष्य पछ्याएको जनकपुर १९.५ ओभरमा ९३ रनमै अल-आउट हुन पुग्यो। जनकपुरमाथिको यो शानदार जितसँगै सुदूरपश्चिमले लगातार तेस्रो विजय हात पार्नुका साथै काठमान्डु गोर्खाजसँगै प्ले अफको यात्रा पक्का गरेको छ। दुवै टोलीको समान ८–८ अंक रहेको छ।

बलिङतर्फ सुदूरपश्चिमका तीब्र गतिका बलरहरू स्कट कुग्लेन र हेमन्त धामीले उत्कृष्ट प्रदर्शन गर्दै जनकपुरलाई सुरुबाटै दबाबमा राखेका थिए। कुग्लेनले ४ ओभरमा मात्र १३ रन खर्चेर ३ महत्त्वपूर्ण विकेट लिए भने दीपेन्द्रसिंह ऐरी, अनिल खरेल, इशान पाण्डे र थारिन्दु रत्नायकेको नाममा पनि एक–एक विकेट रह्यो।

यसअघि ब्याटिङ गर्दा सुदूरपश्चिमका लागि ब्रान्डन म्याकमुलेनले सर्वाधिक ३३ रन बनाएका थिए भने थारिन्दु रत्नायके २७ रनमा अविजित रहेका थिए। जनकपुरका लागि कप्तान हरमित सिंहले कसिलो बलिङ गर्दै ४ ओभरमा १७ रन खर्चेर सर्वाधिक ४ विकेट लिए पनि टोलीलाई जिताउन सकेनन्।

यस पराजयसँगै पहिलो संस्करणको उपविजेता जनकपुर बोल्ट्स प्रतियोगिताबाट बाहिरिने उच्च खतरामा पुगेको छ। ६ खेलमा ४ अंक मात्र जोडेको जनकपुरले अब समूह चरणको अन्तिम एक खेल खेल्न बाँकी छ। यस खेलमा सुदूरपश्चिमले उत्कृष्ट फिल्डिङ र अनुशासित बलिङ प्रदर्शन गर्दै खेल आफ्नो पक्षमा पार्न सफल भयो।

सुदूरपश्चिमको यो जितसँगै नेपाल प्रिमियर लिगको प्ले अफ समीकरण थप रोचक बनेको छ भने जनकपुरलाई भने अबको यात्राका लागि अन्य टोलीको नतिजामा निर्भर हुनुपर्ने दबाब बढेको छ।