मन्त्री गीता चौधरीद्वारा थारू आयोगको प्रतिवेदन औपचारिक रूपमा सार्वजनिक

काठमाडौँ, असोज २३ गते । कृषि, वन तथा पर्यावरणमन्त्री गीता चौधरीले थारू आयोगका विभिन्न महत्त्वपूर्ण खोज तथा अध्ययन प्रतिवेदनहरू औपचारिक रूपमा सार्वजनिक गर्नुभएको छ।

थारू आयोगको कार्यालयमा आयोजित विशेष कार्यक्रममा थारू समुदायका अगुवा, बुद्धिजीवी तथा विज्ञहरूको सहभागितामा उहाँले ती प्रतिवेदनहरू सार्वजनिक गर्नुभएको हो।

सार्वजनिक गरिएका प्रतिवेदनहरूमा थारू समुदायको सांस्कृतिक, ऐतिहासिक, स्वास्थ्य तथा सामाजिक-आर्थिक विषयहरूलाई गहन रूपमा समेटिएको छ। जसमा थारू जातिको लोक चित्रकला, परम्परागत खाद्य परिकार, थारू लेखनशैली निर्देशिका, थारू समुदायमा गम्भीर स्वास्थ्य समस्याका रूपमा रहेको सिकलसेल एनिमिया र बिटा थलासेमिया लगायतका अध्ययनहरू रहेका छन्।

यसैगरी, प्रतिवेदनमा मुक्तकमैया तथा कमलहरीहरूको वर्तमान अवस्था, पुनर्स्थापनाको स्थिति र थारू समुदायको ऐतिहासिक बलिदानीको इतिहासलाई समेत दस्तावेजका रूपमा समावेश गरिएको छ। यी अध्ययनहरूले थारू समुदायको पहिचान संरक्षण र अधिकार प्राप्तिको लडाइँमा महत्त्वपूर्ण योगदान पुर्‍याउने अपेक्षा गरिएको छ।

कार्यक्रममा बोल्दै मन्त्री चौधरीले प्रतिवेदनहरू तयार हुनु मात्र ठुलो कुरा नभएको उल्लेख गर्दै यसमा समेटिएका सिफारिस र नीतिगत विषयहरूको प्रभावकारी कार्यान्वयनका लागि थारू अगुवाहरूले पनि दबाब र पहल बढाउनुपर्नेमा जोड दिनुभयो। उहाँले राज्यका सम्बन्धित निकायहरूलाई प्रतिवेदन कार्यान्वयनमा सक्रिय गराएर थारू समुदायका समस्या समाधान गरिने प्रतिबद्धता व्यक्त गर्नुभयो।