नेपाली कांग्रेसकी केन्द्रीय सदस्य उम्मेदवार विनिता खड्का ठगी आरोपमा महाधिवेशनस्थलबाटै पक्राउ

काठमाडौँ, असोज २४ गते । नेपाल प्रहरीको केन्द्रीय अनुसन्धान ब्युरो (सिआईबी) ले नेपाली कांग्रेसको १५औँ महाधिवेशनमा केन्द्रीय सदस्य पदकी उम्मेदवार विनिता खड्कालाई पक्राउ गरेको छ। इजरायल पठाइदिने भन्दै रकम ठगी गरेको प्रकरणमा संलग्नता देखिएपछि खड्कालाई शुक्रबार महाधिवेशनस्थल खुलामञ्चबाटै पक्राउ गरिएको हो।

कांग्रेसको खुला महिलातर्फ केन्द्रीय सदस्य पदमा उम्मेदवारी दिएकी खड्का महाधिवेशन प्रतिनिधिसँग मत माग्दै गरेका बेला प्रहरीले नियन्त्रणमा लिएको सिआईबीका प्रवक्ता प्रहरी वरिष्ठ उपरीक्षक अनुपमशमशेर जबराले जानकारी दिनुभयो।

यसअघि वैदेशिक रोजगारीका नाममा ठगी गरेको आरोपमा पक्राउ परेका रामेछापका भरत चौलागाईंको बयान र अनुसन्धानका क्रममा खड्काको नाम पनि जोडिएको थियो।

यस प्रकरणमा प्रहरीले यसअघि दोलखाकी बालिका सिवाकोटी र भरत चौलागाईंलाई पक्राउ गरी अनुसन्धान गरिरहेको छ। पक्राउ परेकाहरूमाथि इजरायल पठाइदिने प्रलोभन देखाएर करिब दुई करोड ५० लाख रुपियाँ ठगी गरेको गम्भीर आरोप रहेको छ।

खड्का यसअघि विशेष महाधिवेशनबाट केन्द्रीय सदस्यमा चयन भएकी थिइन् भने हाल रामेछापबाट महाधिवेशन प्रतिनिधि निर्वाचित भई १५औँ महाधिवेशनमा उम्मेदवार बनेकी थिइन्। प्रहरीले यस विषयमा थप अनुसन्धान अगाडि बढाइएको जनाएको छ।