आज समापन हुँदै सोह्र श्राद्ध: दिवंगत पितृका नाममा तर्पण, सिदादान र पिण्डदान गरिँदै

काठमाडौँ, असोज २४ गते । आश्विन कृष्ण प्रतिपदादेखि सुरु भएको पितृ पक्ष आज अपराह्नकालमा दिवंगत पितृका नाममा तर्पण, सिदादान र पिण्डदान गरी समापन गरिँदैछ।

१५ तिथि र आश्विन शुक्ल प्रतिपदाको एक दिन गरी सोह्र तिथिका दिनसम्म दिवंगत पितृका नाममा तर्पण र पिण्डदान गरिने भएकाले यसलाई सोह्र श्राद्ध भनिने गरिएको छ। आश्विन शुक्ल प्रतिपदाका दिन गरिने मातामह (आमाको बाबु) को श्राद्ध भने भोलि आइतबार गरिन्छ।

आज औँसी तिथि अर्थात् पितृ पक्षको अन्तिम दिन कुनै कारणवश यो पक्षका अरू तिथिमा गर्नुपर्ने श्राद्ध रोकिएको भए गर्नुपर्ने शास्त्रीय मान्यता रहेको छ। यदि आज पनि कुनै कारणले गर्न नसकिएमा आपत् धर्मअनुसार आश्विन शुक्ल प्रतिपदादेखि आश्विन शुक्ल पञ्चमीसम्म गर्न हुने शास्त्रीय वचन रहेको नेपाल पञ्चाङ्ग निर्णायक विकास समितिका पूर्वअध्यक्ष प्राडा रामचन्द्र गौतमले जानकारी दिनुभएको छ।

यो समयमा पनि सोह्र श्राद्ध गर्न नसकिएमा कार्तिककृष्ण औँसी अर्थात् लक्ष्मीपूजाका दिन, वृश्चिक सङ्क्रान्ति (मङ्सिर) तथा पञ्चमीपछिका अष्टमी, द्वादशी र औँसी, भरणी नक्षत्र र व्यतीपात योग परेका दिनहरूमा समेत रोकिएको श्राद्ध गर्न सकिने विकल्प धर्मशास्त्रका ग्रन्थहरूमा उल्लेख छ। यसबाहेक पनि गर्न नसकिएमा सक्नेले आफैँ वा नभए ब्राह्मणमार्फत वैदिक मन्त्रले दैनिक १०८ जप गर्न सकिने विकल्प रहेको छ।

यस अवसरमा गोकर्णेश्वर उत्तरगया, बेत्रावती, देवघाट र त्रिवेणी लगायतका विभिन्न पवित्र तीर्थस्थलहरूमा पितृप्रति श्रद्धा भक्तिसाथ श्राद्ध गर्ने भक्तजनहरूको भीड लाग्ने गर्दछ। पितृ पक्षको समापनसँगै भोलि असोज २५ गते घटस्थापना गरेसँगै बडादसैँ अर्थात् दुर्गा पक्ष सुरु हुनेछ।