माइक्रोसफ्ट र एडोबीसहित ८ ठूला प्रविधि कम्पनीका विदेशी कामदारको ग्रिनकार्ड प्रक्रिया रोक्ने अमेरिकाको निर्णय

काठमाडौँ, असोज २३ गते । अमेरिकी सरकारले माइक्रोसफ्ट, एडोबीसहित आठ ठूला प्राविधिक तथा आउटसोर्सिङ कम्पनीहरूमा कार्यरत विदेशी जनशक्तिको स्थायी बसोबास (ग्रीनकार्ड) सँग सम्बन्धित स्थायी श्रम प्रमाणीकरण (Permanent Labor Certification) प्रक्रिया रोकिदिएको छ।

भिसा दुरुपयोग नियन्त्रण कार्यदलका संयोजक एवम् अमेरिकी उपराष्ट्रपति जेडी भान्सले अमेरिकी श्रमिकको रोजगारी संरक्षण गर्न र भिसा दुरुपयोग रोक्न उक्त कदम चालिएको घोषणा गर्नुभएको हो।

अमेरिकी श्रम मन्त्रालयका अनुसार माइक्रोसफ्ट र एडोबीका साथै टाटा कन्सल्टेन्सी सर्भिसेज (TCS), इन्फोसिस, विप्रो, कग्निजेन्ट, एचसीएल र क्याप-जेमिनाइ जस्ता दिग्गज कम्पनीका नयाँ तथा विचाराधीन आवेदनहरूको प्रक्रिया स्थगित गरिएको छ। उपराष्ट्रपति भान्सले माइक्रोसफ्टले गत वर्ष ६ हजार अमेरिकी कर्मचारी कटौती गरेर ६ हजार ३ सय एच-वान बी (H-1B) भिसामा विदेशी कामदार भित्र्याएको र ३ हजारलाई ग्रिनकार्ड दिलाएर प्रणालीको दुरुपयोग गरेको आरोप लगाउनुभयो।

पछिल्लो समय एआई (AI) र अटोमेसनको तीव्र विकासका कारण अमेरिकी प्रविधि, बैंकिङ तथा अनलाइन बजार क्षेत्रमा व्यापक कर्मचारी छाँटकाँट भइरहेको छ। अमेजनले १६ हजार, एचएसबीसीले २० हजार र माइक्रोसफ्टले ४,८०० भन्दा बढी कर्मचारी कटौती गरिरहेका बेला अमेरिकी कामदारलाई हटाएर कम पारिश्रमिकमा विदेशी कामदार नियुक्त गरिएको भन्दै ट्रम्प प्रशासनले कडाइ सुरु गरेको हो।

यसैबिच अमेरिकी श्रम विभागले विश्वविद्यालयहरूमा दिइने जे-वान (J-1) भिसाको दुरुपयोगबारे पनि अनुसन्धान थालेको छ। हार्भर्ड, स्ट्यान्फोर्ड र एमआईटीसहित ९ शीर्ष विश्वविद्यालयहरू छानबिनको दायरामा परेका छन्। यो निर्णयले हाल अमेरिकामा कार्यरत हजारौँ विदेशी प्राविधिक (विशेष गरी भारतीय र नेपाली कामदार) माझ अन्योल र त्रास सिर्जना गरेको छ।