त्रिभुवन विश्वविद्यालयको ६७औँ वार्षिक दिवस र साधारण सभा सम्पन्न: ३० अर्ब ८७ करोडको बजेट र ९५ हजारभन्दा बढी विद्यार्थीको ग्रेसलिस्ट पारित

काठमाडौँ, असोज २३ गते ।

उच्च शिक्षाको अभिभावक मानिने त्रिभुवन विश्वविद्यालय (त्रिवि) सभाका दुई महत्त्वपूर्ण बैठकहरू बिहीबार एकैदिन सम्पन्न भएका छन्। विश्वविद्यालयका सहकुलपति एवम् शिक्षा तथा खेलकुदमन्त्री सस्मित पोखरेलको अध्यक्षतामा सम्पन्न साधारण बैठकले आगामी आर्थिक वर्ष २०८३/८४ का लागि कुल ३० अर्ब ८७ करोड ११ लाख ८ हजार रुपियाँको वार्षिक बजेट पारित गरेको छ।

यसैगरी, विश्वविद्यालय सभाको ६७औँ वार्षिक दिवस बैठकले २०८२ असार १ देखि २०८३ असार मसान्तसम्म शैक्षिक प्रमाणपत्र लिएका कुल ९५ हजार ५४० जना विद्यार्थीहरूको ६४औँ ग्रेसलिस्ट सर्वसम्मत पारित गरेको छ। ग्रेसलिस्टमा सबैभन्दा बढी व्यवस्थापन सङ्कायका ४३ हजार १४२ जना र सबैभन्दा कम वन विज्ञान अध्ययन संस्थानका १९२ जना विद्यार्थी समेटिएका छन्। ग्रेसलिस्ट पारित भएसँगै यी विद्यार्थीहरू आगामी दीक्षान्त समारोहमा सहभागी हुन योग्य भएका छन्।

बैठकमा त्रिविका कुलसचिव (रजिस्ट्रार) डा. रवीन्द्र सिवाकोटीले प्रस्तुत गर्नुभएको बजेट अघिल्लो आवको तुलनामा ९.७७ प्रतिशतले बढी छ। प्रस्तावित बजेटमा आन्तरिक स्रोतबाट ४९.३८ प्रतिशत र सरकारी अनुदानबाट ५०.६२ प्रतिशत व्यहोरिनेछ। बजेटको ८६.१४ प्रतिशत सञ्चालन खर्च र १३.८६ प्रतिशत पूँजीगत खर्चमा विनियोजन गरिनुका साथै प्राध्यापक/कर्मचारीको दक्षता अभिवृद्धि, प्रविधि, अनुसन्धान तथा विकासमा खर्च गरिनेछ।

त्रिविले परीक्षा प्रणालीलाई पारदर्शी, विश्वसनीय र समयबद्ध बनाउँदै परीक्षा सकिएको एक महिनाभित्र नतिजा प्रकाशन गर्ने नीति लिएको छ। साथै, विद्यार्थी भर्ना, परीक्षा, छात्रवृत्ति, मानसिक स्वास्थ्य परामर्श र करिअर विकासलाई एकीकृत प्रणालीबाट सञ्चालन गर्ने तथा थापाथली क्याम्पसको बल्खुस्थित जग्गामा चार्जिङ स्टेसन, वर्कसप, र सवारी परीक्षण प्रयोगशाला स्थापना गरी आन्तरिक आय बढाउने योजनासमेत स्वीकृत गरिएको छ।

प्रमुख विवरण, बजेट तथा ग्रेसलिस्ट तथ्याङ्क