नेपाली ब्राण्डलाई विश्व बजारमा स्थापित गर्न नीतिगत सहजीकरण गरिन्छ: सञ्चारमन्त्री डा. विक्रम तिमिल्सिना

काठमाडौँ, असोज २२ गते । सूचना तथा सञ्चारमन्त्री डा. विक्रम तिमिल्सिनाले नेपाली उत्पादनको मौलिकता, पहिचान र बौद्धिक सम्पत्तिको संरक्षण गर्दै नेपाली ब्राण्डलाई विश्व बजारमा स्थापित गर्न सरकारले नीतिगत तथा प्रक्रियागत सहजीकरण गर्ने बताउनुभएको छ।

कर्पोरेट नेपालद्वारा आयोजित ‘नेपाली ब्राण्ड परिसंरचना २०८३’ प्रतिवेदन सार्वजनिक कार्यक्रममा बोल्दै उहाँले उक्त प्रतिबद्धता व्यक्त गर्नुभएको हो।

सञ्चारमन्त्री डा. तिमिल्सिनाले नेपाली ब्राण्डको प्रवर्द्धनका लागि विद्यमान नीतिगत र संरचनागत समस्याहरूको पहिचान गरी समाधान खोज्नुपर्नेमा जोड दिनुभयो। औद्योगिक तथा बौद्धिक सम्पत्तिको संरक्षणका लागि राज्यका सम्बन्धित निकाय, निजी क्षेत्र र सरोकारवालाबिच एकीकृत सहकार्य अपरिहार्य रहेको उहाँको भनाइ थियो।

उहाँले नेपालका विशिष्ट उत्पादन, मौलिक पहिचान र भौगोलिक विशेषता (Geographical Indication) बाट अन्तर्राष्ट्रिय बजारमा लाभ लिन सकिने उल्लेख गर्नुभयो। सूचना प्रविधिको आधुनिक विकासले भौगोलिक सीमाभन्दा बाहिर नेपाली उत्पादनलाई सहजै लैजान सक्ने वातावरण बनेकाले भौगोलिक पहिचानसँग जोडिएका वस्तुलाई बौद्धिक सम्पत्तिका रूपमा जोगाउनुपर्ने उहाँले बताउनुभयो।

नेपाली ब्राण्डको विकास केवल व्यापारिक विषय मात्र नभई मुलुकको अर्थतन्त्रसँग समेत जोडिएको भन्दै उहाँले ब्राण्डिङ प्रचार-प्रसार मात्र नभएर मौलिकता र छुट्टै पहिचान निर्माण गर्ने प्रक्रिया भएको उल्लेख गर्नुभयो। आफ्ना उत्पादनमा नेपालीपन र मौलिकता स्थापित गर्न सके दीर्घकालीन रूपमा उपभोक्ताको विश्वास जित्न सकिने मन्त्री तिमिल्सिनाले बताउनुभयो।