वीर अस्पतालको आकस्मिक सेवा सुधार्न प्रधानमन्त्री कार्यालय र स्वास्थ्य मन्त्रालयको कडा निर्देशन: छुट्टै काउन्टर र टोकन प्रणाली लागू

काठमाडौँ, असोज २३ गते । वीर अस्पतालको आकस्मिक (इमरजेन्सी) कक्षमा बिरामीले घण्टौँसम्म कुर्नुपरेको र उपचार नपाएर फर्कनुपरेको विषयमा प्रधानमन्त्री तथा मन्त्रिपरिषद्को कार्यालय र स्वास्थ्य तथा खाद्य स्वच्छता मन्त्रालयले गम्भीर चासो व्यक्त गरेका छन्। दुवै निकायले चिकित्सा विज्ञान राष्ट्रिय प्रतिष्ठान (न्याम्स) र अस्पताल प्रशासनका पदाधिकारीहरूलाई बोलाएर सेवा तत्काल सुधार्न कडा निर्देशन दिएका हुन्।

स्वास्थ्य तथा खाद्य स्वच्छता मन्त्रालयका सचिव डा. विकास देवकोटाका अनुसार आकस्मिक कक्षमा आउने कुनै पनि बिरामीलाई कुनै पनि बहानामा उपचारबाट वञ्चित नगर्न र प्राथमिकताका आधारमा तत्काल सेवा प्रवाह गर्न निर्देशन दिइएको छ।

मन्त्रालयले आकस्मिक उपचारका लागि छुट्टै काउन्टरको व्यवस्था गर्नसमेत भनेको छ। अस्पताल प्रशासनले भने त्यस दिन बिरामीको अत्यधिक भिडभाड र सर्भरमा समस्या आएका कारण केही ढिलाइ हुन पुगेको स्पष्टीकरण दिएको थियो।

प्रतिष्ठानका उपकुलपति प्रा.डा. विवेक आचार्य र वीर अस्पतालका निर्देशक डा. विकास नेपालले हालैको घटनाबाट पाठ सिक्दै आकस्मिक सेवामा व्यापक सुधार गरिएको जानकारी दिनुभएको छ। अबदेखि आकस्मिक कक्षमा आउने बिरामीका लागि छुट्टै टोकन प्रणाली र सफ्टवेयरमा सुधार गरी जुनसुकै खाली काउन्टरबाट तत्काल टिकट उपलब्ध हुने व्यवस्था मिलाइएको छ।

यसअघि सर्लाही हरिवनका हेमसागर सुवेदी वीर अस्पतालको आकस्मिक कक्षमा घण्टौँ कुर्नुपरेपछि महाराजगन्जस्थित त्रिवि शिक्षण अस्पताल पुग्नुभएको थियो, जहाँ उहाँको तत्काल एपेन्डिक्सको शल्यक्रिया गरिएको थियो। अस्पताल प्रशासनले अबका दिनमा कुनै पनि बिरामीले उपचार नपाई फर्कनुपर्ने अवस्था आउन नदिने प्रतिबद्धता जनाएको छ।