नेकपा (एमाले) को मङ्सिर पहिलो साता राष्ट्रिय भेला हुने: वडा र पालिका अधिवेशनको मिति तय

काठमाडौँ, असोज २३ गते । नेपाल कम्युनिस्ट पार्टी (एमाले) ले आगामी मङ्सिरको पहिलो साता राष्ट्रिय भेला आयोजना गर्ने निर्णय गरेको छ। बिहीबार बसेको एमाले स्थायी कमिटीको बैठकले उक्त राष्ट्रिय भेला बोलाउने औपचारिक निर्णय गरेको प्रचार विभाग प्रमुख नीरज आचार्यले जानकारी दिनुभयो।

प्रचार विभाग प्रमुख आचार्यका अनुसार उक्त भेलामा एमाले केन्द्रीय कमिटी, प्रदेश तथा जिल्लाका पदाधिकारीहरू, पालिकाका अध्यक्ष र उपाध्यक्षका साथै सङ्घ, प्रदेश र स्थानीय तहका जन-प्रतिनिधिहरूको बाक्लो सहभागिता रहनेछ। भेलामार्फत पार्टीको भावी सङ्गठनात्मक रणनीति र समसामयिक राजनीतिक विषयमा व्यापक छलफल गरिनेछ।

स्थायी कमिटी बैठकले पार्टीको तल्लो तहको अधिवेशनको समयतालिकासमेत स्वीकृत गरेको छ। जसअनुसार आगामी मङ्सिर २६ गते देशभरका वडा अधिवेशन र पुस ४ गते पालिका अधिवेशन सम्पन्न गरिनेछ। वडा र नगर अधिवेशन सम्पन्न भएपश्चात् प्रदेशस्तरीय भेलाहरूको आयोजना गरिने योजना एमालेले बनाएको छ।

यसैगरी, मधेश प्रदेश सभामा समानुपातिकतर्फ रौतहटबाट प्रतिनिधित्व गर्ने सांसद जैनब खातुनको निधन भएपछि रिक्त स्थानमा बन्दसूचीको क्रमसङ्ख्या ४० मा रहेकी नाजमा खातुनलाई मनोनयन गरी निर्वाचन आयोगमा पठाउने निर्णय बैठकले गरेको छ।

साथै, रिक्त रहेका जिल्ला नेतृत्वको व्यवस्थापन जिल्लाबाटै अध्यक्ष तोकी आयोजक कमिटीका रूपमा रूपान्तरण गरेर माथिल्लो कमिटीमा अनुमोदनका लागि पठाउनेसमेत निर्णय भएको छ।

प्रमुख निर्णय तथा अधिवेशन तालिका