छुट जग्गा दर्तामा १० लाख घुस लिने नापी अधिकृत वलीविरुद्ध भ्रष्टाचार मुद्दा दायर

काठमाडौँ, असोज २२ गते । छुट जग्गा दर्ताको सिफारिससहितको फाइल सम्बन्धित कार्यालयमा पठाइदिने र प्रक्रियामा सहजीकरण गरिदिने भन्दै सेवाग्राहीसँग १० लाख रुपियाँ घुस लिएको आरोपमा नापी अधिकृत डिल्लीबहादुर वलीविरुद्ध भ्रष्टाचार मुद्दा दायर भएको छ। अख्तियार दुरुपयोग अनुसन्धान आयोगले बिहीबार विशेष अदालत, काठमाडौँमा वलीविरुद्ध आरोपपत्र दायर गरेको हो।

नापी कार्यालय डिल्लीबजार अन्तर्गत ३ नम्बर नापी टोली, माछापोखरीका टोली प्रमुखसमेत रहेका वलीले छुट जग्गा दर्तासम्बन्धी मिसिल फाइल भूमि प्रशासन कार्यालय, मनमैजुमा पठाउनका लागि सेवाग्राहीसँग घुस माग गरी सास्ती दिने गरेका थिए। उजुरीका आधारमा अख्तियारको टङ्गालस्थित केन्द्रीय कार्यालयबाट खटिएको टोलीले वलीलाई १० लाख रुपियाँ घुस लिइसकेको अवस्थामा नियन्त्रणमा लिएको थियो।

अनुसन्धानका क्रममा वलीले सेवाग्राहीलाई नियतवश दुःख दिई १० लाख रुपियाँ घुस रकम असुल गरेको पुष्टि भएपछि अख्तियारले कानुनबमोजिम कारबाही प्रक्रिया अघि बढाएको हो। आयोगका अनुसार वलीको उक्त कार्य भ्रष्टाचार निवारण ऐन, २०५९ अन्तर्गतको गम्भीर कसुर मानिन्छ।

अख्तियारका प्रवक्ता सुरेश न्यौपानेका अनुसार वलीविरुद्ध भ्रष्टाचार निवारण ऐन, २०५९ को दफा ३ को उपदफा (१) बमोजिम १० लाख रुपियाँ बिगो कायम गरी सोही ऐनको दफा ३ को उपदफा (१) को देहाय (घ) बमोजिम कैद सजाय र बिगोबमोजिम जरिवानाको मागदाबी गर्दै विशेष अदालतमा मुद्दा दर्ता गरिएको छ।

प्रमुख विवरण तथा कानुनी कारबाही