नेपाली कांग्रेसको १५औँ महाधिवेशन: नयाँ नेतृत्व चयनका लागि आज बिहान १० बजेदेखि मतदान सुरु हुँदै

काठमाडौँ, असोज २२ गते । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि आज बिहीबार बिहान १० बजेदेखि मतदान प्रक्रिया सुरु हुँदैछ। महाधिवेशनमा सहभागी कुल ७ हजार २५५ जना महाधिवेशन प्रतिनिधिहरूले २९७ सदस्यीय नयाँ केन्द्रीय कार्यसमिति चयनका लागि मतदान गर्नेछन्।

यसअघि केन्द्रीय निर्वाचन समितिले बिहान ७ बजेदेखि नै मतदान सुरु गर्ने कार्यतालिका सार्वजनिक गरेको भए पनि लगातारको भारी वर्षा र केही प्राविधिक कारणले गर्दा ३ घण्टा पछि सारेर बिहान १० बजेदेखि साँझ ६ बजेसम्मका लागि मतदानको समय तोकिएको हो। सभापतिसहित सम्पूर्ण पदाधिकारी र सदस्य पदका उम्मेदवारहरूको अन्तिम नामावली बुधबार साँझ नै सार्वजनिक भइसकेको छ।

निर्वाचन समितिका संयोजक एवं वरिष्ठ अधिवक्ता प्रेमबहादुर खड्काका अनुसार प्रतिनिधिहरूको सहजताका लागि प्रदेश तथा प्रतिनिधित्व गर्ने समूहका आधारमा छुट्टाछुट्टै मतदान केन्द्रको व्यवस्था गरिएको छ। जसअनुसार बागमती प्रदेशका लागि राष्ट्रिय सभा गृह र अन्य प्रदेश तथा जनसम्पर्क समितिका प्रतिनिधिहरूका लागि खुलामञ्च परिसरभित्रका विभिन्न हलहरू तोकिएका छन्।

प्रतिनिधिहरूले मतदानस्थलमा प्रवेश गर्दा मोबाइल फोनलगायतका निषेधित सामग्री लैजान पाउने छैनन्। मतदाता नामावली र परिचयपत्र रुजु गरेपछि मात्र मतदान गर्न पाइने व्यवस्था मिलाइएको छ। साँझ ६ बजे मतदान सम्पन्न भएसँगै मतगणना सुरु गरिने र गणना सकिएलगत्तै अन्तिम परिणाम घोषणा गरिने निर्वाचन समितिले जनाएको छ।

मतदान केन्द्र र तोकिएको प्रतिनिधि समूह