मलेसिया जान २५ पिआरए र २५० एआरए सूचीकृत म्यानपावर मात्रै योग्य: बेस्टिनेटद्वारा नयाँ मेमो जारी, नेपाल सरकारको असहमति

काठमाडौँ, असोज २२ गते । मलेसियाको फरेन वर्कर्स सेन्ट्रलाइज्ड म्यानेजमेन्ट सिस्टम (FWCMS) मा सूचीकृत वैदेशिक रोजगार व्यवसायी कम्पनी (म्यानपावर) ले मात्रै मलेसियामा श्रमिक पठाउन सक्ने गरी नयाँ मेमो जारी भएको छ।

मलेसियाको बेस्टिनेट एसडिएन. भिएचडीले जारी गरेको मेमो अनुसार आगामी नोभेम्बर ५ (कात्तिक १९ गते) देखि सूचीकृत २५ वटा प्रिन्सिपल रिक्रुटमेन्ट एजेन्सी (PRA) र २५० वटा एसोसियट रिक्रुटमेन्ट एजेन्सी (ARA) ले मात्रै नेपाली श्रमिक पठाउन पाउने छन्।

बेस्टिनेटले अक्टोबर ६ (असोज २० गते) जारी गरेको मेमो अनुसार नयाँ प्रणाली लागु हुनुअघि विद्यमान व्यवस्थाबाट हुँदै आएको बायो-मेडिकल दर्ता र स्वास्थ्य परीक्षणका लागि अन्तिम कट-अफ मिति तोकिएको छ। जसअनुसार पुराना व्यवस्था अन्तर्गत नेपाली श्रमिकको बायो-मेडिकल दर्ताका लागि अक्टोबर १५, २०२६ सम्मको अन्तिम म्याद दिइएको छ। सो मितिसम्म बायो-मेडिकल विवरण एफडब्लुसिएमएसमा दर्ता भइसक्नुपर्नेछ।

नयाँ व्यवस्था लागु भए पनि हाल भइरहेको मेडिकल सेवा तत्काल बन्द नहुने वा पुराना श्रमिकको नतिजा स्वतः रद्द नहुने बेस्टिनेटले स्पष्ट पारेको छ। तर, सीमित (२५ र २५०) म्यानपावर एजेन्सीबाट मात्रै श्रमिक लैजाने मलेसियाको यो एकपक्षीय निर्णयप्रति नेपाल सरकारले असहमति जनाएको छ। नेपालले ती सूचीकृत म्यानपावरहरूको पूर्व-श्रमस्वीकृति रोक्का गरी छानबिन सुरु गरेको छ।

नेपाल वैदेशिक रोजगार व्यवसायी सङ्घका अध्यक्ष डिकबहादुर खत्रीले यो मेमो निजी क्षेत्रबाट आएकाले सरकारी स्तरबाट सम्झौता नभएसम्म कार्यान्वयन हुन नसक्ने दाबी गर्नुभएको छ। दुवै देशबिच कूटनीतिक नोट आदान-प्रदान भइरहेको र अब दुवै देशको संयुक्त समितिको बैठक बसेर मात्रै यो विवाद र प्राविधिक गाँठो फुकाउनुपर्ने देखिएको छ।

प्रमुख विवरण तथा कट-अफ समयसीमा