नेपाली कांग्रेसको १५ औँ महाधिवेशन: गुटगत राजनीति अन्त्यको घोषणा, ‘राष्ट्रिय पुनर्जागरण’ प्रस्ताव सर्वसम्मतिले पारित र आज मतदान

काठमाडौँ, असोज २२ गते । नेपाली कांग्रेसको १५ औँ महाधिवेशनले पार्टीभित्रको गुटगत राजनीति पूर्ण रूपमा अन्त्य गर्दै सङ्गठन पुनर्संरचना, नयाँ पुस्ताको सहभागिता र नागरिकलाई राजनीतिक उपलब्धिको प्रत्यक्ष प्रतिफल दिने सङ्कल्प गरेको छ।

महाधिवेशनको बन्दसत्र समापन समारोहलाई सम्बोधन गर्दै सभापति गगनकुमार थापाले विगतमा रहेका सबै गुट-उपगुट आजैका दिनदेखि समाप्त भएको घोषणा गर्नुभयो।

सभापति थापाद्वारा प्रस्तुत ‘राष्ट्रिय पुनर्जागरण तथा समुन्नति’ सम्बन्धी राजनीतिक प्रस्ताव महाधिवेशनले सर्वसम्मतिले पारित गरेको छ। उक्त प्रस्तावमा ‘समुन्नत नेपाल, सम्मानित नेपाली’ को लक्ष्यसहित निर्वाचनपूर्व गठबन्धन नगर्ने, सङ्गठनलाई योग्यतामा आधारित बनाउने र आगामी छ महिना पार्टी निर्माण तथा सङ्गठन सुदृढीकरणमा केन्द्रित हुने कार्यदिशा तय गरिएको छ।

त्यस्तै उपसभापति विश्वप्रकाश शर्माको समसामयिक प्रस्ताव, महामन्त्री गुरुराज घिमिरेको सङ्गठनात्मक र कोषाध्यक्ष उमेश श्रेष्ठको आर्थिक प्रतिवेदन पनि सर्वसम्मतिले पारित भएका छन्।

यसैबिच, नयाँ केन्द्रीय नेतृत्व चयनका लागि आज बिहीबार बिहान १० बजेदेखि मतदान प्रक्रिया सुरु हुँदैछ। देशभरिबाट आएका कुल ७ हजार २५५ जना महाधिवेशन प्रतिनिधिहरूले मताधिकार प्रयोग गर्नेछन्। भिडभाड व्यवस्थापनका लागि राष्ट्रिय सभागृह, खुलामञ्च र प्रज्ञा भवनमा गरी सात वटा मतदान केन्द्र तोकिएका छन्।

निर्वाचन समितिका अनुसार वरिष्ठ उपाध्यक्षमा विश्वप्रकाश शर्मा र महिला उपसभापतिमा पुष्पा भुसालको मात्र उम्मेदवारी परेकाले उहाँहरू निर्विरोध निर्वाचित हुनुभएको छ, जसको औपचारिक घोषणा हुन बाँकी छ। अन्य बाँकी पदहरूका लागि भने प्रदेश र प्रतिनिधित्वका आधारमा तोकिएका मतदान केन्द्रहरूमा मतदान हुनेछ।

महाधिवेशनका प्रमुख निर्णय तथा विवरण